Səudiyyə Ərəbistanı Kral Kubokunun final matçı keçirilib. Həlledici oyunda ''Əl-Hilal'' ilə ''Əl-Xolud'' qarşılaşıb.

Oyunda əsas hadisələr ilk yarıya təsadüf edib. ''Əl-Xolud'' 4-cü dəqiqədə Ramiro Enrike ilə hesabı açsa da, sürprizə gücü çatmayıb. Favorit sayılan ''Əl-Hilal'' 42-ci dəqiqədə Nasser Əl-Davsari və 45+2-ci dəqiqədə Teo Ernandesin qolları ilə qələbə qazanıb. ''Əl-Hilal''ın heyətində türkiyəli müdafiəçi Yusuf Akçiçək 46-cı dəqiqədə meydana daxil olub.

Beləliklə, Ər-Riyad təmsilçisi son 4 ildə 3-cü, ümumilikdə 12-ci dəfə Kral Kubokunu qazanmağa müvəffəq oldu. Bu komanda daxili birincilikdə də ''Əl-Nəssr'' ilə çempionluq mübarizəsi aparır.

İtaliyalı mütəxəssis Simone İnzaqi, eləcə də ötən yay ''Fənərbaxça''dan transfer olunan Yusuf Akçiçək ''Əl-Hilal''da ilk titulunu qazanmış oldu.