Çempionlar Liqasında yarımfinal mərhələsinə start verildi.

"Football-plus.az" xəbər verie ki, ilk oyun günündə PSJ ''Bavariya''nı qəbul etdi.

Böyük maraqla gözlənilən bu qarşılaşma ümidləri artıqlaması ilə doğrultdu və məhsuldarlıq rekordunu qırdı. Qol şousunu penaltidən fərqlənən Keyn açıq elan etdi. Parislilər buna Kvaratsxeliyanın baxımlı qolu və 174 sm boya malik Neveşin başla vurduğu qolla cavab verdi. Olise hesabı 2:2 etsə də, bu da ilk yarıda son qol olmadı. Fasilə ərəfəsində VAR-ın müdaxiləsindən sonra təyin olunan şübhəli penaltini Dembele dəqiq yerinə yetirərək PSJ-ni 3:2 önə keçirdi. ÇL tarixində ilk dəfə yarımfinalda bir hissəyə 5 qol vuruldu!

Paris nəhəngi ikinci hissədə də hücumlarını davam etdirərək Kvaratsxeliya və Dembelenin qolları ilə hesabı darmadağın həddinə çatdırdı. Amma bu mövsüm geridönüşlər üzrə püxtələşən ''Bavariya'' Upamekano və Diasın qolları ilə fərqi minimuma endirdi. Bərabərlik qolunu vurmaq mümkün olmasa da, Münhen nəhəngi hesabı 4:5 etməklə cavab matçı üçün intriqanı bərpa etdi. Turnirin tarixində ilk dəfə yarımfinalda bir oyuna qapılara 9 qol vuruldu!

Buna qədər yarımfinalda bir oyuna 7-dən artıq top vurulmamışdı. Kvaratsxeliyanın oyununu xüsusi qeyd etməyə dəyər. Dubl edən gürcüstanlı ulduz bu mövsüm ÇL-də artıq aktivinə 10 qol, 5 məhsuldar ötürmə yazıb. Bir mövsümə ÇL-də 15 məhsuldar hərəkət PSJ üçün yeni rekorddu. Gürcüstan yığması hər nə qədər dünya çempionatına vəsiqə qazana bilməsə də, Kvaratsxeliya bu performansını davam etdirəcəyi təqdirdə ''Qızıl top''u qazanmaq şansları artacaq.

Maraq üçün bildirək ki, PSJ-nin fransalı ulduzu Dembele ''Qızıl top''u qazandığı ötən mövsümdə ÇL-də aktivinə yalnız 8 qol, 6 məhsuldar ötürmə yazmışdı. Keynin ardıcıl 8-ci rəsmi oyunda fərqləndiyini də bildirək. Bu mövsüm bütün turnirlərdə 54-cü qolunu vuran ingiltərəli forvard da sözsüz ki, ''Qızıl top''a əsas namizədlərdən biri olacaq.

''Bavariya''nın əzəmətli Keyn (54), Dias (26) və Olise (20) triosu bu mövsüm bütün turnirləri nəzərə almaqla ümumilikdə 100 qol vurub!