Çempionlar Liqasının pley-off mərhələsinə dünən baş tutan 4 qarşılaşma ilə start verildi. Böyük səbirsizliklə gözlənilən ''Mançester Siti'' ilə ''Real''ın növbəti dueli ümidləri artıqlaması ilə doğrultdu.

Buna qədər karyerasında heç vaxt ''Real''a qol vura bilməyən Holann bu görüşdə dubl edərək komandasını iki dəfə hesabda önə keçirdi. Amma ''kral klubu'' inanılmaz əzmkarlıq nümayiş etdirərək Mbappe, Dias və Bellingemin qolları ilə 3:2 hesablı qələbə qazandı. Mbappe 3-cü fərqli klubun heyətində ''Siti''yə qol vurdu. Buna qədər o, ''Monako'' və PSJ-nin heyətində Xosep Qvardiolanın komandasını məyus etmişdi. Gələn həftə Madriddə baş tutacaq cavab oyunu ərəfəsində əla üstünlük yaxalayan və ilk dəfə ''Siti''ni səfərdə məğlub edən ''Real'' eyni zamanda Avropanın ən mötəbər klub turnirində 300-cü qələbəsini qazandı. ''Blankos'' 1955-ci ildən keçirilən bu turnirdə 300 qələbə həddinə çatan ilk klub oldu. Bu göstəricidə ikinci pillədə ''Bavariya'' (241), üçüncü pillədə ''Barselona'' (209) qərarlaşıb. Qeyd edək ki, həm Serxio Aqueronun sözləri, həm də ''Siti'' fanatlarının açdığı böyük banner matçda intiqanı bir qədər də artırmışdı. Yerli fanatlar tribunada üzərində Rodrinin ''Qızıl top''la birlikdə şəkli olan və ''ağlamağı burax'' mənasını verən ''stop crying your heart out'' ifadəsini yazmışdılar.

Təbii ki, bu sözlər ''Qızıl top'' uğrunda mübarizədə Rodriyə məğlub olan Vinisiusa ünvanlanmışdı. Amma Vini qol vurmasa da, fanatların cavabını artıqlaması ilə verdi. Komandasının son iki qolunda yaxından iştirak edən braziliyalı ulduz matçın ən yaxşı oyunçusu seçildi! Final fitinin ardından sosial şəbəkələrdə ən çox müzakirə olunan isimlərdən biri də Aquerodu. ''Siti''nin əfsanəsi hesab olunan, qısa müddət ''Barselona''da da top qovan sabiq argentinalı forvard oyundan öncə ingilislərin qalib gələcəyinə şübhə etmirdi. O hətta açdığı bir canlı yayında ''Real'' qalib gəlsə, xayalarımı kəsərəm'' ifadəsini işlətmişdi. Ona görə də indi hamı Aqueronun verdiyi vədlə bağlı nə deyəcəyini gözləyir.

ƏLİ