Keyn və ''Bavariya'' Zaqreb ''Dinamo''sunu dağıtdı

18.09.2024 20:15 221
Dünya futbolu
Çempionlar Liqasında ''Qarabağ''ı hər iki oyunda məğlub edərək qrup mərhələsinə vəsiqə qazanan Zaqreb ''Dinamo''su üçün ilk oyun günü faciəvi alındı.

Xorvatiya çempionu Münhendə 9 qol buraxdı! Harri Keynin 3-ü penaltidən olmaqla 4 qol vurduğu qarşılaşmada Münhen nəhəngi 9:2 hesablı tarixi qələbə qazandı. Bu qarşılaşmada bir sıra maraqlı rekordlar qeydə alındı. Birincisi, ''Bavariya'' ÇL-də bir oyuna 9 qol vuran ilk klub oldu. Daha iki rekord Keynin adı ilə bağlıdı.

Buna qədər ÇK dönəmi də daxil olmaqla bu turnirdə bir oyunda penaltidən 3 qol vuran futbolçu olmamışdı. Bundan başqa Keyn ÇL-də vurduğu qolların sayını 33-ə yüksəltməklə Ueyn Runini (30) geridə qoydu və turnirin tarixinin ən məhsuldar ingiltərəli futbolçusuna çevrildi.

Və nəhayət, ikinci hissədə meydana çıxan Tomas Müller Çempionlar Liqasında ''Bavariya''nın heyətində 152-ci oyununu keçirdi. O, ''Barselona''da 151 oyuna çıxan Xavi Ernandesin rekordunu yeniləyərək bu turnirdə bir klubun heyətində ən çox oyun keçirmiş futbolçuya çevrildi.

ƏLİ