Derbidə ''Qalatasaray'' önündə rüsvay olan və faktiki olaraq çempionluq şansını itirən ''Fənərbaxça''da bazar ertəsi idarə heyətinin təcili toplantısı keçirildi.

"Football-plus.az" xəbər verir ki, gözlənildiyi kimi burda radikal qərarlar qəbul edildi. Təxminən 2 saat davam edən toplantının ardından yönəticilər klubun bazasına yollandılar. Burda isə baş məşqçi Domeniko Tedesko, idman direktoru Devin Özək və futbolçularla görüşlər baş tutdu.

Rəhbərliyin qərarı ilə həm Tedesko, həm Devin Özək, həm də futbol koordinatoru Berke Çelebi ilə yollar ayrıldı! Qalan 3 turda komanda köməkçi məşqçi Zəki Murat Gölənin başçılığı altında meydana çıxacaq.

Beləliklə, İstanbul nəhəngində Tedeskonun təxminən 8 ay davam edən macərası üzücü şəkildə başa çatdı. Bir çox ünlü sələfi kimi Tedesko da ''sarı-lacivərdlilər''in çempionluq həsrətinə son qoya bilmədi.

Xatırladaq ki, komanda 2014-dən bu yana çempion ola bilmir. İtalyanəsilli almaniyalı mütəxəssis mövsümün əvvəllərində Joze Mourinyonun istefaya göndərilməsindən sonra bu vəzifəyə gətirilmişdi. ''Fənərbaxça'' onun dönəmində keçirdiyi 45 rəsmi oyundan 26 qələbə, 12 heç-heçə, 7 məğlubiyyətlə ayrılmış oldu. Tedesko Türkiyə karyerasında yalnız superkubok qazanmağa müvəffəq oldu.

Bu arada rəhbərlik son həftələrdə ''Fənər''ə sanki qənim kəsilən qapıçı Edersonla bağlı da qərar qəbul edib. Tanınmış qapıçının əsas heyətdən kənarlaşdırılacağı ilə bağlı xəbərlər təsdiqini tapmayıb. Ona yalnız pul cəzası verilib.

Derbidə qırmızı vərəqə alan Edersona federasiya tərəfindən hansı cəza veriləcəyi də maraq doğurur. Bundan başqa rəhbərliyin növbədənkənar seçkilərin keçirilməsi ilə bağlı qərar qəbul etdiyi də bildirilir. Bunun da qısa müddətdə rəsmən açıqlanacağı gözlənilir.