Məlum olduğu kimi Türkiyə çempionatının 30-cu turunda ''Fənərbaxça'' çempionluq mübarizəsində çox ciddi bir zərbə aldı.

"Football-plus.az" xəbər verir ki, İstanbul nəhəngi evdə ''Çaykur Rizəspor''la qarşılaşmada 2:2 bərabərə qalaraq lider ''Qalatasaray''dan 4 xal geri düşdü. Özü də məhz derbi ərəfəsində.

Həmin oyunun son anlarında Edersonun çıxışdakı səhvi digər olayların hamısını kölgədə qoydu. Amma ''Fənər''in 90+8-ci dəqiqədə qol buraxmasına səbəb olan cərimə zərbəsi əslində hakimin uydurması imiş. Bunu oyundan sonra ekspertlər və sabiq hakimlər də vurğulamışdı.

Bu arada həmin görüşün hakimi Adnan Kayatepenin balı məlum olub. ''Sporx'' saytının paylaşdığı xəbərə inansaq, hakim-inspektor Somer Karakaş bu oyundakı idarəçiliyinə görə Kayatepeyə 7,4 bal verib. Bu bal isə hakimin çox zəif performans sərgiləməsi mənasını verir!

Adətən bu qiyməti alan hakim bir neçə həftə məcburi istirahət etməli olur. Elə həmin mənbənin yazdığına inansaq, bu ədalət təmsilçisi bu mövsüm bir daha heç bir oyuna təyinat almayacaq. Belə çıxır ki, hakim-inspektor da oyunun son anlarında yaşanan epizodu nəticəyə təsir edən kobud səhv kimi qiymətləndirib.

Xatırladaq ki, həmin epizodda ''Fənər''li futbolçu irəli çıxan və top ayağında olan qapıçıya yüngül toxunsa da, qapıçı özünü yerə ataraq fiti gözləmədən topu əlinə götürdü. Hakim isə qapıçıya ikinci sarı vərəqəni göstərmək əvəzinə ən asan variantı seçdi və ''Fənər''in əleyhinə cərimə zərbəsi təyin etdi. Məhz həmin cərimə zərbəsi zamanı qapıçının uzun ötürməsi qolla nəticələndi.