Türkiyə çempionatının 26-cı turunda çempionluğa namizədlər bu gün meydana çıxacaq. ''Fənərbaxça'' ''Antalyaspor''u qəbul edəcəksə, ''Qalatasaray'' ''Kasımpaşa''nın qonağı olacaq.

''Football-plus.az'' xəbər verir ki, bir oyunun hakim təyinatı yenə birmənalı qarşılanmayıb.

Belə ki, ''Qalatasaray''ın oyununa Cihan Aydın təyinat alıb. Məsələ burasındadı ki, ötən mövsüm bu hakimin ''Qalatasaray'' azarkeşi olduğu üzə çıxmışdı. Aydın ötən il federasiya ilə hakimlər arasında keçirilən onlayn toplantılardan birinə qızının profili ilə daxil olmuşdu. Həmin profilin adı ''ən böyük ''Qalatasaray''lı Mira'' idi. Təbii ki, bir ailədə kiçik qız ''Qalatasaray'' fanatıdısa, böyük ehtimalla ona bu sevgi atasından keçib.

Həmin hadisədən sonra 32 yaşlı ədalət təmsilçisi Türkiyə futbol ictimaiyyətində ''Cim-Bom'' azarkeşi kimi tanınmağa başladı. İndi mövsümün bu cür həlledici məqamında Cihan Aydının ''Qalatasaray''ın oyununa təyinat alması müzakirələrə səbəb olub. ''Sarı-lacivərdlilər''in idarə heyətinin üzvü Fethi Pekin klubun rəsmi saytına bununla bağlı açıqlamalar verib.

O, hakimin ədalətli davranacağına dair şübhələrini dilə gətirib və hətta Rayan Babelin bu günlərdə verdiyi qalmaqallı açıqlamanı da xatırladıb. Niderlandlı Babel ''yutub''da qatıldığı bir verilişdə ''Qalatasaray''da oynadığı dönəmdə bəzi matçlarda hakimlərin hesabına qalib gəldiklərini etiraf etmişdi. Amma digər tərəfdən ''Qalatasaray''ın bu mövsüm superliqada xal itirdiyi 3 qarşılaşmadan birini məhz Aydın idarə edib. Söhbət 20-ci turda baş tutan və 1:1-lik bərabərliklə yekunlaşan ''Hatayspor''la səfər oyunundan gedir.

Bu, indiyə qədər ''Qalatasaray''ın bu hakimin idarəçiliyi ilə keçirdiyi 7 oyunda xal itirdiyi yeganə qarşılaşmadı.

ƏLİ