Çempionlar Liqasının “Bavariya” – “Real” matçının (4:3) sonunda stadionda təhlükəli vəziyyət yaranıb. 1/4 finalın cavab oyunu xoşagəlməz hadisə ilə yadda qalıb.

"Football-plus.az" xəbər verir ki, son saniyələrdə vurulan qoldan sonra yerli azarkeşlərin meydana axışması nəticəsində bir neçə fotoqraf xəsarət alıb. Maykl Olisenin vurduğu həlledici qol tribunalarda böyük coşğuya səbəb olub. “Alyants Arena”nın tribunalarından enən tərəfdarlar meydana daxil olaraq qələbəni futbolçularla birlikdə qeyd etmək istəyiblər. Bu məqamda izdihamda qalan “Reuters” agentliyinin fotoqrafı Kay Oliver Pfaffenbax tapdalanaraq huşunu itirib. O, hadisə zamanı bədənində ciddi ağrılar və əziklər yarandığını bildirib.

Hadisə yerinə dərhal tibbi personal cəlb olunub və fotoqrafa ilkin yardım göstərilib. İzdiham zamanı daha bir fotoqrafın da xəsarət aldığı qeyd olunur.