Salvador futbolunda faciə baş verib. Stadionda izdiham nəticəsində azı 12 nəfər ölüb.

“Football-plus.az” xəbər verir ki, hadisə ölkənin paytaxtı San Salvadorda “Alyans” və FAS komandaları arasında keçirilən oyun zamanı baş verib. Qapılar bağlı olan zaman çoxlu sayda azarkeş tribunalara girməyə cəhd edib. Bu vaxt basırığa düşərək xəsarət alıblar. Yerli orqanlar bəzi azarkeşlərə saxta biletlərin satıldığını güman edir və araşdırma aparıldığını bildirib. Nəticədə matç dayandırılıb, Salvador çempionatının bazar gününə planlaşdırılan oyunları isə təxirə salınıb.

Rəsmi məlumatlara görə, izdihamda azı 12 nəfər ölüb. Salvador Mülki Müdafiə Xidmətinin mətbuat katibinin məlumatına görə, 500-ə yaxın azarkeşə tibbi yardım göstərilib, onların çoxu xəstəxanalara aparılıb.

Səhiyyə naziri Fransisko Alabi yaralıların əksəriyyətinin vəziyyətinin sabit olduğunu bildirib. Salvadorun prezidenti Nayib Bukele klublar, onların menecerləri, stadionların rəhbərliyi, liqa və futbol federasiyası daxil olmaqla hər kəsin fəaliyyətinin araşdırılacağını bildirib: “Təqsirkar kim olur-olsun, cəzasız qalmayacaq”.