Braziliya çempionatında aprelin 11-12-də 11-ci turin oyunları keçirildi. Qeydə alınan nəticələrdən sonra lider dəyişməsə də, turnir cədvəlinin ən yüksək pillələrində dəyişikliklər baş verdi.

Mart-aprel aralığında ardıcıl 5 qələbə qazanmaqla yenidən liderliyi ələ alan “Palmeyras” uğurlu seriyanı davam etdirə bilmədi. Son mövsümün gümüş mükafatçısı səfərdə “Korintians”dan bir xal ala bildi. Bu mövsüm zəif çıxış edən meydan sahibləri əzəli rəqibini əzmkarlıqla büdrətməyi bacardılar. Matçın gedişində baş verən hadisələr qonaqların işinə yaraya bilərdi. Belə ki, 35-ci dəqiqədə yarımmüdafiəçi Andre Luis, 71-ci dəqiqədə isə müdafiəçi Mateuzinyo qırmızı vərəqə aldı. Ciddi itkilərə baxmayaraq, “Korintians” San Paulu derbisində hesabına xal yazmağı bacardı. Qolsuz “sülh” çempionatdakı qələbə seriyası qırılan Abel Ferreyranın komandasının mövqeyinə təsir etmədi. “Palmeyras” indi əsas izləyicilərini 6 xal qabaqlayır.

Çünki tura hərəyə 20 xal toplamaqla 2-3-cü yerləri bölüşməklə başlayan hər iki komanda məğlub oldu. “San Paulu” səfərdə “Vitoriya”dan xal ala bilmədi. İki cavabsız qolla uduzan Rojer Maşadonun komandası topların fərqinə görə 3-cü yerə düşdü. A seriyasında 6-cı turdan sonra turnir cədvəlinə başçılıq edən “San Paulu”da baş məşqçi dəyişikliyinin mənfi effekt verdiyi göz qabağındadı. Argentinalı Ernan Krespo ilə yolların müəmmalı şəkildə ayrılmasından sonra komandada aşkar eniş yaşanır. “Üçrənglilər” son 5 oyunda hesabına yalnız 4 xal yazmaqla tədricən əsas hədəflərindən ayrı düşüblər.

10-cu turdan sonra 3-cü yerdə olan “Fluminense” də hesabat turunu xalsız başa vurdu. Rio de Janeyro derbisində “Flamenqo”ya 1:2 hesablı məğlubiyyət Luis Subeldiyanın komandasını 4-cü yerə saldı. Mövsümə zəif başladığı üçün Filipe Luisi baş məşqçi vəzifəsindən qovan son çempion Leonardo Jardimin rəhbərliyi altında keçirdiyi 7 oyunda hesabına 16 xal yaza bilib. Bu nəticə ehiyatda bir oyunu olan “Flamenqo”nu topların fərqinə əsasən 4-cü yerdən 2-yə qaldırdı. Çempion indi liderdən 6 xal geri qalır.

Tur “Bayya” üçün də uğurlu alındı. Komanda autsayder “Mirassol”a 2:1 hesabıyla qalib gəldi. Bu nəticə ehtiyatda bir oyunu olan salvadorluların 5-ci yerdəki mövqeyini qorumasına şərait yaratdı. Maraqlıdı ki, lider “Palmeyras”ı 20 xala malik olan 4 komanda izləyir.

Ötən mövsümün bürünc mükafatçısı olan “Kruzeyro”dan istefaya göndərilən baş məşqçi Titenin yerini tutan Artur Jorjenin gəlişi hələ ki istənilən effekti vermir. Mövsümün ilk 10 oyununda hesabına 7 xal yaza bilən “Kruzeyro” hesabat turunda qələbə qazandı. Hələ də autsayderlər qrupunda olan komandanın 19-cu yerdən 17-yə yüksəlməsi yerli azarkeşlər üçün yalnız kiçik təsəlli ola bilər.

11-ci tur
Korintians - Palmeyras 0:0

Vitoriya - San Paulu 2:0
Kaka, 35. Ramon, 83.

Fluminense - Flamenqo 1:2
Savarino, 76 – Pedro, 7; 51.

Mirassol - Bayya 1:2
Duarte, 14-öz qapısına – Juba, 65-p. Sanabriya, 89.

Atletiko Paranaense - Şapekoense 2:0
Mendosa, 57. Viveros, 81.

Remo - Vasku da Qama 1:1
Marllon, 84 – K.Qomes, 54.

Santos - Atletiko Mineyro 1:0
Moyses, 63.

İnternasyonal - Qremio 0:0

Botafoqo RJ - Koritiba 2:2
Dabilo, 55. Kabral, 77 – B.Lopes, 33. Laveqa, 79.

Kruzeyro - Braqantino 2:1
Vilyarreal, 18. Kristian, 49 - Urtado, 6.

1. Palmeyras 11 8 2 1 21-10 26
2. Flamenqo 10 6 2 2 18-10 20
3. San Paulu 11 6 2 3 15-9 20
4. Fluminense 11 6 2 3 18-13 20
5. Bayya 10 6 2 2 15-10 20
6. Atletiko Paranaense 11 6 1 4 17-13 19
7. Koritiba 11 4 4 3 13-12 16
8. Atletiko Mineyro 11 4 2 3 14-13 14
9. Braqantino 11 4 2 5 11-12 14
10. Vitoriya 10 4 2 4 11-14 14
11. Botafoqo RJ 10 4 1 5 18-21 13
12. Qremio 11 3 4 4 14-14 13
13. Vasku da Qama 11 3 4 4 15-17 13
14. İnternasyonal 11 3 4 4 9-10 13
15. Santos 11 3 4 4 14-16 13
16. Korintians 11 2 5 4 8-11 11
17. Kruzeyro 11 2 4 5 14-21 10
18. Remo 11 1 5 5 11-18 8
19. Şapekoense 10 1 5 4 10-18 8
20. Mirassol 10 1 3 6 11-16 6

Bombardirlər: Vinisius (Qremio) - 7, Kalyeri (San Paulu), Danilo (Botafoqo RJ), Viveros (Atletiko Paranaense) - 6.