Braziliya çempionatında 32-ci tur da “Botafoqo” üçün düşərli alındı. Lider qələbə qazandı, əsas izləyicisi isə məğlub oldu. Nəticədə “Botafoqo” ilə “Palmeyras” arasındakı xal fərqi 6-ya yüksəldi.

Lider üçün “Vasku da Qama” ilə ev oyunu asan keçdi. Matça fırtına kimi başlayan Artur Jorjenin komandası ilk 12 dəqiqədə Savarino və Luis Enrikenin qolları ilə əhəmiyyətli üstünlük əldə etdi. Fasilə ərəfəsində qonaqların müdafiəçisi Joao Viktorun növbəti xəbərdarlığa görə meydandan qovulması ilə matçın nəticəsi böyük ölçüdə müəyyənləşdi. Rio de Janeyro derbisində ikinci hissədə də böyük üstünlüyə malik olan ev sahibləri daha bir qol vurdular. 3:0 hesablı qələbə “ağ-qaralar”ı çempionluq yarışında bir qədər də önə çıxardı.

“Botafoqo” indi əsas izləyicisini 6 xal qabaqlayır. Ona görə ki, “Palmeyras” turu xalsız başa vurdu. Braziliyanın son çempionunun “Korintians” ilə səfər oyununa maraq böyük idi. San Paulu derbisi ev sahiblərinin üstünlüyü ilə keçdi. Matçın qəhrəmanı Qarro oldu. 26 yaşlı argentinalı yarımmüdafiəçi fasiləyə az qalmış hesabı açdı, ikinci hissənin əvvəlində isə Yuri Albertoya məhsuldar ötürmə verdi. Bu mövsüm 7-ci məğlubiyyətini alan “Palmeyras” çempionluq yarışında bir qədər də gerilədi. Abel Ferreyranın çalışdırdığı komanda indi liderdən 6 xal geri qalır.

“Fortaleza” isə üçoyunluq qələbəsizliyə son qoydu. Xuan Voyvodanın komandası səfərdə “Juventude”nin qapısından üç cavabsız top keçirdi. Fortalezalılar bu qələbə ilə çempionluğa iddiasını davam etdirdilər. Onlar finişə 6 tur qalmış “Botafoqo” ilə 7 xallıq fərqi qorudular.

Oktyabrda istefaya göndərilən Titenin səlahiyyətlərini müvəqqəti icra edən 39 yaşlı Filipe Luisin çalışdırdığı “Flamenqo” səfərdə “Kruzeyro”dan maksimum xal aldı. Minimal hesabla qalib gələn qanaq komanda çempionluq şansını davam etdirir. Doğrudu, “Flamenqo” liderdən 9 xal az toplayıb. İstənilən halda “ümid sonda ölür” düşüncəsi ilə hərəkət edən rio de janeyrolular azarkeşlərini mövsümün həlledici oyunlarına kökləmək üçün əllərindən gələni etməyə çalışırlar.

32-ci tur
Botafoqo RJ - Vasku da Qama 3:0
Savarino, 9. Luis Enrike, 12. Junior Santos, 71.
Korintians – Palmeyras 2:0
Qarro, 41. Yuri Alberto, 56.
Juventude - Fortaleza 0:3
Moyses, 45+3. Mankuso, 45+7. Kuşçeviç, 71.
Kruzeyro – Flamenqo 0:1
David Luiz, 53.
İnternasyonal – Krisiuma 2:0
Alan Patrik, 43. Uesli, 90+3.
Bayya - San Paulu 0:3
Luiz Qustavo, 41. Vellinqton Rato, 66. Lukas Moura, 90+1.
Fluminense - Qremio 2:2
Aryas, 43. Kaua Elias, 66 – Breytueyt, 26. Reynaldo, 90+9-p.
Braqantino – Kuyaba 0:0
Atletiko Paranaense - Vitoriya 1:2
Jilmar, 31 - Alerrandro, 33. Mateuzinyo, 65.
Atletiko Qoyaniense - Atletiko Mineyro 1:0
Janderson, 89.

1. Botafoqo RJ 32 20 7 5 52-26 67
2. Palmeyras 32 18 7 7 53-27 61
3. Fortaleza 32 17 9 6 44-32 60
4. Flamenqo 32 17 7 8 51-37 58
5. İnternasyonal 32 15 11 6 44-28 56
6. San Paulu 32 16 6 10 45-33 54
7. Bayya 32 13 7 12 42-40 46
8. Kruzeyro 32 12 8 12 36-34 44
9. Vasku da Qama 32 12 7 13 36-46 43
10. Atletiko Mineyro 31 10 11 10 42- 46 41
11. Qremio 32 11 6 15 38-41 39
12. Vitoriya 32 11 5 16 37-46 38
13. Korintians 32 9 11 12 37-40 38
14. Fluminense 32 10 7 15 28-34 37
15. Krisiuma 32 9 10 13 38-46 37
16. Braqantino 32 8 11 13 34-40 35
17. Atletiko Paranaense 31 9 7 15 33-39 34
18. Juventude 32 8 10 14 38-51 34
19. Kuyaba 32 6 10 16 25-41 28
20. Atletiko Qoyaniense 32 6 7 19 24-50 25

Bombardirlər: Pedro (Flamenqo), Estevao (Palmeyras) - 11, Halk (Atletiko Mineyro) - 10.