Səudiyyə Ərəbistanı çempionatının 27-ci turunda ''Əl-Nəssr'' ''Əl-Riyad''ı qəbul etdi.

''Football-plus.az'' xəbər verir ki, qocalmaq bilməyən Kriştiano Ronaldo yenə komandası üçün vacib qollar vurdu. Hərçənd oyun Ər-Riyad təmsilçisi üçün heç də asan keçmədi.

Doğma fanatları önündə oynayan ''Əl-Nəssr'' 45-ci dəqiqədə buraxdığı qolla gözlənilmədən fasiləyə geridə yollandı. Amma ikinci hissənin əvvəllərində Kriştiano ''sazı əlinə aldı''. Portuqaliyalı superulduz 56 və 64-cü dəqiqədə vurduğu qollarla komandasına 2:1 hesablı əzmkar qələbə qazandırdı.

Ronaldo ötən tur ''Əl-Hilal'' ilə səfər matçında da dubl etmişdi. Sonuncu dəfə onun ardıcıl 2 oyunda dubl etməsinə ötən ilin noyabrında rast gəlinmişdi. Qarşısına 1000 qol həddinə çatmaq kimi çətin və tarixi bir hədəf qoyduğu üçün futbol dünyasının diqqətlə təqib etdiyi Ronaldo peşəkar karyerasında uyğun olaraq 932 və 933-cü qollarını vurdu.

Maraqlıdı ki, baş məşqçi Stefano Pyolinin Ronaldo ilə problem yaşadığı və istefaya göndərilə biləcəyi haqda xəbərlər yayıldıqdan bu yana komanda yüksəlişə keçib. 3-cü pillədə qərarlaşan ''Əl-Nəssr'' çempionatda ardıcıl 3-cü qələbəni bayram edərək xalını 57-yə yüksəltdi. 2-ci pillədə qərarlaşan və bu tur büdrəyən son çempion ''Əl-Hilal''ın 58 xalı var. ''Əl-İttihad'' sona 7 tur qalmış 65 xalla liderdi və çempionluğu əldən buraxacağı gözlənilmir. Amma ''Əl-Nəssr'' ən azı 2-ci pilləni tutaraq Asiya Çempionlar Liqasına vəsiqə qazana bilər.

40 yaşlı Ronaldonun 23 qolla bombardirlər yarışına başçılıq etdiyini bildirək. Əla mövsüm keçirən ünlü forvard 2024/25-də keçirdiyi 35 rəsmi oyunda 32 qol, 4 məhsuldar ötürməlik performans sərgiləyib!

Ümumilikdə isə o, ''Əl-Nəssr''də indiyə qədər meydana çıxdığı 105 qarşılaşmada aktivinə 96 qol, 19 məhsuldar ötürmə yazaraq 115 qolun vurulmasında yaxından iştirak edib.