Səudiyyə Ərəbistanı çempionatının 31-ci turunda ''Əl-Nəssr'' düşmə zonasında yer alan ''Əl-Oxdud''un qonağı oldu.

''Football-plus.az'' xəbər verir ki, son iki rəsmi görüşdə məğlub olan Ər-Riyad təmsilçisi acığını autsayderdən çıxdı. Kriştiano Ronaldonun adı iştirak ərizəsinə salınmamışdı. Buna baxmayaraq ''Əl-Nəssr'' tarixinin ən parlaq qələbəsini qazandı.

Qonaqlar ilk yarıya 4 qol sığışdırdılar. Qapıçı Paulo Vitor fasilədən dərhal sonra qırmızı vərəqə aldığından ''Əl-Oxdud'' demək olar, bütün ikinci hissəni azlıqda keçirməli oldu. Bu məqam qonaqların işini bir qədər də asanlaşdırdı. Hücumlarını davam etdirən ''Əl-Nəssr'' fasilədən sonra daha 5 top vurdu. Nəticədə komanda 9 cavabsız qol vuraraq rəsmi matçlarda tarixinin ən böyükhesablı qələbəsini qazandı.

Komandanın rekordu buna qədər 8:0 idi. Bu hesab ötən mövsümün 26-cı turunda səfərdə ''Abha'' ilə oyunda qeydə alınmışdı. Həmin vaxt Ronaldo het-trik etmişdi. Bu dəfəki tarixi qələbədə isə komandanın digər ulduzu Sadio Mane ön plana çıxdı. ''Liverpul''un sabiq ulduzu 4 qol birdən vuraraq Səudiyyə Ərəbistanı karyerasında həm ilk het-trikini, həm də ilk pokerini rəsmiləşdirdi. Artıq çempionluq şansını itirən ''Əl-Nəssr'' sona 3 tur qalmış 63 xalla 3-cü pillədədi. Komandanın Ronaldonun olduğu son iki oyunda uduzması, Ronaldosuz isə bu cur performans sərgiləməsi sosial şəbəkələrdə müzakirələrə yol açıb. Fanatların çoxu Ronaldonun iştirak etdiyi oyunlarda ''Əl-Nəssr''in daha zəif təsir bağışladığını iddia edib.

Qeyd edək ki, ''Qızıl top''un beşqat qalibinin klubdakı gələcəyi hələ də qeyri-müəyyəndi. Onun müqaviləsi mövsümün sonunda başa çatır.

Rəhbərlik komandanın nəticələrindən narazıdı. ''Əl-Nəssr'' portuqaliyalı superulduzla hələ də heç bir ciddi titul qazanmayıb.