“Krasnodar” Kordobanın sayəsində liderliyini qorudu - İCMAL
Tur iddialılar üçün uğurlu alındı.
"Football-plus.az" xəbər verir ki, böhrandan çıxa bilməyən və bu dəfə evdə ÇSKA-ya uduzan “Akron”un qələbəsiz seriyası 7 oyuna yüksəldi. Maraqlıdı ki, bu görüşdə “hərbçilər”in qələbə qolu yeni tətbiq olunan qayda sayəsində vuruldu. “Akron”un qapıçısı topu 11 saniyə əlində saxladığından hakim künc zərbəsi təyin etdi və məhz bu epizod qolla nəticələndi! “Krılya Sovetov” “Zenit”lə səfər oyununda pis təsir bağışlamasa da, xal qopara bilmədi. Rusiya futbolunda ən çox tənqid olunan forvardların başında gələn Sobolevin premyer-liqada ardıcıl 4-cü oyunda fərqlənməsi diqqəti çəkdi. “Zenit” müstəqil Rusiya çempionatında ilk dəfə dəfə bir mövsümün gedişində evdə 10 oyunluq qələbə seriyası yaxaladı.
2022-ci ildəki 13 oyunluq seriya iki mövsümə yayılmışdı. Premyer-liqada bir mövsüm ərzində sonuncu dəfə belə seriya yaxalayan klub 2016/17-də “Spartak” olmuşdu. Moskva “Dinamo”su autsayder “Orenburq”la ev oyununda əvvəlcə 2:0, sonra 3:2 öndə olmasına baxmayaraq, xal itirdi. “Dinamo” bu mövsüm hesabda öndə olduğu oyunlarda ən çox (17) xal itirən komandadı. Tyukavin “Dinamo”da 56-cı qolunu vurdu və XXI əsrdə klubun ən məhsuldar oyunçusu olan Kevin Kuranyiyə çatdı. Kordoba “Krasnodar”ı çiynində daşımaqda davam edir. Kolumbiyalı forvard çətin Qroznı səfərində son anlarda fərqlənməklə komandasına həyat verdi. Məhz bu qol sayəsində “öküzlər” liderliyi davam etdirdilər. Amma növbəti turda “Zenit”in taleyi artıq öz əlində olacaq. Çünki Piterə məhz “Krasnodar” qonaq gələcək.
“Baltika” Mahaçqalada 1 xala şükür etməli oldu. Bu mövsüm müdafiəsi ilə diqqəti çəkən bu komanda son 8 ayda ilk dəfə bir oyunda 1-dən artıq qol buraxdı! Debütant sonuncu dəfə 3-cü turda – avqustun əvvəllərində “Orenburq”la ev oyununda (3:2) belə aqibətlə üzləşmişdi. “Rostov”un Nijni Novqorodu 1 qolla fəth etdiyi oyunda bu komandanın üzvü Viktor Melexin 22 yaş 1 aylığında XXI əsrdə Rusiya çempionatında 100 oyun həddinə ən gənc yaşda çatan mərkəz müdafiəçisinə çevrildi. Moskva derbisində isə “Lokomotiv” fasiləyə öndə yollanmasına baxmayaraq, sonda heç 1 xal da qazana bilmədi. 72-ci dəqiqədən azlıqda qalan “dəmiryolçular” bu mövsüm ilk dəfə Moskva təmsilçisinə boyun əydilər. “Spartak” isə bu mövsüm hesabda geridə olduğu oyunlarda ən çox (12) xal qazanan komandadı.
23-ci tur
Zenit – Krılya Sovetov 2:1
Con, 49. Sobolev, 55 – Babkin, 75.
Zenit: D.Adamov, Karavayev (Drkuşiç, 78), Diveyev, Nino, Veqa, Barrios (D.Santos, 62), Vendel (Pedro Enrike, 70), Qorşkov (Kondakov, 70), Con, Qluşenkov (Luis Enrike, 62), Sobolev.
Axmat – Krasnodar 0:1
Kordoba, 86.
Krasnodar: Aqkatsev, Paltsev (Kobnan, 73), Tormena, Kosta, Olasa, Krivtsov, Lenini, Qonsales, Spertsyan (Çernikov, 60), Batçi (Boselli, 75), Kordoba.
Spartak – Lokomotiv 2:1
Barko, 66-p. Solari, 83 – Montes, 23.
Spartak: Maksimenko, Denisov, Vu, Ciku, Zobnin, Litvinov, Umyarov, Barko, Fernandeş (Polex, 79), Solari, L.Qarsiya (Uqalde, 46).
Lokomotiv: Mitryuşkin, Silyanov, Morozov, Montes, Fasson, Prutsev, Karpukas, Bakayev (Komliçenko, 68), Batrakov, Rudenko, Vorobyev (Nyamsi, 76).
Akron – ÇSKA 1:2
Dzyuba, 60-p. – Qondu, 5. Kruqovoy, 84.
ÇSKA: Akinfeyev, Qayiç, Lukin, Danilov (Viktor, 90+5), Kruqovoy, Kislyak, Barinov, Karmo (Kozlov, 66), Oblyakov (Musayev, 73), Qlebov (Rays, 66), Qondu.
Dinamo Mh – Baltika 2:2
Ağalarov, 53; 72-p. – Xil, 13. Varatınov, 81.
Dinamo M – Orenburq 3:3
Mufi, 29-öz qapısına. Tyukavin, 39. Bitello, 61 – Mufi, 45+2. Du Keyros, 51; 66.
Nijni Novqorod – Rostov 0:1
Ronaldo, 29.
Soçi – Rubin 0:1
Bezrukov, 20.
1. Krasnodar 23 16 4 3 48-16 52
2. Zenit 23 15 6 2 43-16 51
3. Lokomotiv 23 12 8 3 49-32 44
4. Baltika 23 11 10 2 32-11 43
5. ÇSKA 23 13 3 7 36-25 42
6. Spartak 23 12 5 6 37-31 41
7. Rubin 23 9 6 8 23-25 33
8. Dinamo M 23 8 7 8 40-33 31
9. Axmat 23 8 6 9 27-29 30
10. Rostov 23 6 7 10 18-25 25
11. Akron 23 5 7 11 28-40 22
12. Dinamo Mh 23 5 7 11 14-29 22
13. Krılya Sovetov 23 5 6 12 23-42 21
14. Nijni Novqorod 23 6 2 15 18-37 20
15. Orenburq 23 4 7 12 24-36 19
16. Soçi 23 2 3 18 20-53 9
Bombardirlər: Kordoba (Krasnodar) – 14, Xil (Baltika) – 13, Batrakov (Lokomotiv) – 12.
Növbəti turun oyunları aprelin 11-13-ü aralığında keçiriləcək: Zenit – Krasnodar, Krılya Sovetov – Axmat, ÇSKA – Soçi, Lokomotiv – Dinamo Mh, Rubin – Orenburq, Baltika – Nijni Novqorod, Rostov – Spartak, Akron – Dinamo M
Oyundan sonra
Xuan Karlos Karsedo, “Spartak”ın baş məşqçisi:
“Belə bir derbidə və vacib oyunda bu qədər qol fürsəti yaxalamağımız məni sevindirdi. Hərçənd ilk yarıda istədiklərimizi həyata keçirə bilmədik. Qarsiyanın fasilədə əvəzlənməsi də məhz bununla bağlı idi. İrəlidə hərəkətlilik çatışmırdı. Ancaq fasilədən sonra rəqibi bir baş üstələdik və 5-6 qol şansı yaxaladıq. Yaxşı formadayıq və kubokda “Zenit”lə oyuna yüksək əhval-ruhiyyədə çıxacağıq. Oyundan öncə futbolçularla söhbətdə onlara izah etmişdim ki, 1-2 oyunda qalib gəlmək asandı. Amma qələbə seriyası yaxalamaq daha vacib və çətindi. Biz indi bu seriyanı yaxalamışıq və bunu mümkün qədər çox davam etdirməyə çalışacağıq”.
Mixail Qalaktionov, “Lokomotiv”in baş məşqçisi:
“İlk yarıda oyuna çox yaxşı nəzarət edirdik. “Spartak”a qapımıza yaxınlaşmağa imkan vermədik. İkinci hissədə onlar təzyiqi və tempi artırdılar. Ancaq biz də səhvlərə yol verməyə başladıq. Qırmızı vərəqə bu səhvlərdən biridi. Oyunun taleyini ayrı-ayrı detallar həll etdi. Belə gərgin oyunlarda çalışmalıyıq, daha az səhvə yol verək. Elə ikinci buraxdığımız qolun əvvəlində də topu özümüz itirdik. İki fərqli hissə izlədik. Son anları hücumda keçirsək də, xal qazanmaq üçün kifayət etmədi. Morozovu penaltidən sonra nə üçün əvəzləmədim? Təcrübəli futbolçudu və onun daha səliqəli oynayacağına ümid bəsləyirdim”.
Digər xəbərlər
