"Qarabağ" Misli premyer-liqasının 26-cı turunda "Karvan-Yevlax"ı məğlub etdi - 7:0.

"Football-plus.az" xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavabladı.

- Adətən "Qarabağ" çempionatda dominant olur, rəqiblərini qabaqlayır və bu qədər xal fərqi ilə geriyə düşmür. Belə olan halda komanda vəziyyətə daha başqa cür reaksiya verməlidi. Bu mənada, komanda hazırkı durumda necə reaksiya verməlidisə, onu verə bilir?
- Əlbəttə ki verir. Komandada xatakter olmasa, nəticələr olmazdı. Çünki uğursuz seriyamız olub, sonra geridönüş edə bilmişik. Amma alınmayan vaxtlar da olub. Daxili problemlər olub, futbolçuların çoxu istədiyimiz formada olmayıblar. Futbolçuların potensialı var, təcrübəli komandayıq. Sona kimi çalışırıq ki, qələbə qazanaq. "Sabah" yaxşı balanslaşmış komandadı. "Neftçi", "Zirə", "Turan Tovuz" oyunlarını yaxşılaşdırıblar, sabit oyun və nəticə göstərirlər. Hər oyuna hazır olmalıyıq. Çalışmalıyıq ki, nəticə vermək üçün düz nədisə, ondan əl çəkməyək.

- Hakimlik məsələsi çox danışılır. Çempionatın bu vəziyyətinə hakimliyin nə dərəcədə təsiri var?
- Fikir bildirmək bəlkə düzgün deyil. Amma ümumən kənardan nə görünür? Hakimlər bilmirlər nə qərar versinlər. Bilmirəm tələb çoxdu, yoxsa dünya futbolunda da hansı yeni qaydalar olur. Hakimlər bir az tərəddüd içindədi. Məndə də olur, bəzən təcrübəsiz futbolçudan oyunun gedişatında çox şey tələb edirəm. Bəzən görürsən ki, təcrübəsizlik ona mane olur. Birində düz edir, o birində yox. Bir qayda olmalıdı. Futbolun dili birdi, hakimliyin də. Ola bilər tam formalaşmaq lazımdı. Öz hakimlik məktəbimiz olmalıdı. Avropa nə qədər desə də, bizim də öz dəst-xəttimiz, qanunlarımız olmalıdı. Hakimlər sanki bir az təzyiq altındadı. Allah köməkləri olsun. Çünki ən çox müzakirə olunan onlardı, basqı onlardadı. Allah işlərini asanlaşdırsın.