Millimizin baş məşqçisi Ayxan Abbasovun sabah Sent Lüsiyaya qarşı keçirəcəkləri oyundan əvvəl mətbuat konfransı təşkil olunub.

"Football-plus.az" xəbər verir ki, mütəxəssis jurnalistlərin suallarını cavablandırıb:

– Niyə millidə Yusif İmanov yoxdu?
– Niyə olmalıdı? Yusifin legioner karyerası yaxşı alınmadı. “Kəpəz”ə qayıdandan sonra bir neçə oyunda özünü yaxşı göstərdi. Qapıçı mövqeyi bizim üçün çətindi. Çempionatda da komandalar legionerlərə üstünlük verir, rəqabət var. Rəqabətdə qalib gəlməlidilər. Millinin hər dəfə siyahısı çıxanda hansısa adlar önə gətirilir. Necə ki, Mahir Emrelini Fransa ilə oynadanda çox qınadılar. Amma həmin vaxtdan sonra komandasında ona qarşı fikirlər müsbətə dəyişdi. Futbolun yazılmamış qanunları var. Nəyisə bilir, görürüksə, çağırırıq. Şahruddinlə bağlı həkimlərlə danışdıq və tam hazır olduqlarını bildirdilər. Kapitanımızdı, liderlik keyfiyyəti var. Məşqlərdə də o qədər əzmkardı ki, onu gələcək toplanışa da düşünürük. Gələcəkdə Yusif və ya digərləri daha yaxşı olacaqsa, çağırılacaq. Daha əvvəl Kamran və Mehdini deyirdilər, bu dəfə adları hallanmır. Bütün futbolçulara qapılar açıqdı.

– Növbəti rəqib bizdən çox zəifdi. Sabah böyük hesabla qalib gəlib, tarixi nəticə düşünürsüz?
– Bu iki oyunda daha çox komanda olmağa çalışacağıq. Əvvəlki matçlarda rəqiblər çox imkan vermirdi. Bu oyunlarda maksimumu etməyə çalışacağıq. İnanıram ki, yaxşı toplanış keçirəcəyik.

– 11-ci yerdə gedən komandadan iki qapıçı çağırmaq nə dərəcə məntiqlidi?
– Bu sual mənə qəribə gəlir. Premyer-liqada 11-ci yerdə gedən komandadan başqa hansında yerli qapıçı əsas heyətdədi? Fikirlərinizə hörmətlə yanaşıram. Baxırıq, qapıçıların durumlarını nəzərə alırıq. Hazırda Rza və Yusif əsas heyətdədi. “Sumqayıt”da da gənc qapıçı var, Xəyal. O da U-21 yığmamızın vacib üzvüdü. Xəyalın da bu gün performansına baxırıq, böyük oyunlar üçün hazırdımı? Bunlara baxırıq. Yoxlanış üçün vaxtımız yoxdu. Əsas milli hazırdı və yoxlanış edək deyə fikir yoxdu. Gələcəkdə U-23 millimiz olarsa, belə oyunçuları orda yoxlama olar. Bizdə o qədər vaxt yoxdu indi sınaq edək.

– Bu mövsüm sizin üçün ən böyük çətinlik nədi?
– Premyer-liqada çətinliyi arxada qoyduq. Qarşımıza qoyulan məqsəd liqada qalmaq idi. Bəlli büdcəmiz var idi. Rəqabətin çətin olacağını bilirdik. Məncə, bu mübarizədən qalib ayrıldıq. Yuxarı pillələrə qalxmaqda çətinlik yaşadıq. Millidə ilk gələndə çətinlik yaşadıq. Ağır oyunlar oldu. Ukrayna ilə matçdan bir xal qazandıq, fransızlara uduzduq. Milli komanda ondan əvvəl də bir xal qazanmışdı. Bu mövsüm tam başqadı. Hədəf Millətlər Liqasında C Liqasına qalxmaqdı. Litva, Lixtenşteyn bizə ad baxımından rahatlıq verə bilər. Amma asan oyunlar olmayacaq. Bu matçlara yaxşı hazır olmalı, qalib ruhunu yaratmalıyıq.

– Özünüzü bir neçə il də millidə görürsüzsə, bu, sual sizi maraqlandırar… Dünən U-19 yığması Litvaya 0:4 hesabıyla uduzub. Bu uşaqlar gələcəyin əsas yığmasını formalaşdıracaq…
– Realist, səmimi olaq. Problemlərdən danışıram, xoşlanılmır. Bu gün fikirləşirik ki, yığmanın müdafiə mövqeyində oyunçuların ortalama yaşı yuxarıdı. U-21 yığmasının məşqçisi ilə danışıram, o da müdafiəçi problemindən danışır. Hər kəs problemi bilir, iş baxımından başlamalı, səbirli olmalıyıq. Bəli, problemlər həllini tapana qədər aşağı yaş qrupları çox çalışmalıdı. Bu oyunçular da klublardan gəlir. Akademiyalara diqqət artmalıdı. Millinin məşqçisi 10-12 gün toplanış müddətində nəyisə çox dəyişə bilmir. Futbolçular milliyə hazır gəlməlidi. İndi baxırıq, “Sabah”ın, “Neftçi”nin, “Zirə”nin yerli oyunçuları formadadı. Bu, bizi sevindirir. Uşaq futboluna baxış dəyişməlidi. Nə qədər danışırıqsa, fərq olmur. 10 il əvvəl meydança problemindən danışırdıqsa, yenə də eyni məsələdi. Hər kəs nəticə, avroliqa, rəqabət və s. haqda danışır.

– Futbolçuların diqqəti klublarında, avrokuboklardadı. O oyunçuları qısa müddətdə necə milliyə kökləmək olar? 20 aydı, qələbə qazanmırıq…
– Səhv etmirəmsə, 4-cü toplanışımdı. Futbolçular indi çox yaxşı əhvaldadı. İlk dəfədi, belə görürəm. Futbolçular var ki, zədələri olsa belə, yığmaya gəlib, oynamaq istəyir. Onların istəyi var. Biz də belə məqamları danışırıq. Futbolçular da qələbə istəyir. Burda məşqçi, futbolçu yox, ölkə məsələsi var. İnanın, məşqlər də çox maraqlı keçir. İntensivlik var idi. Futbolçuların istəyi var. Futbolda hər nəticəyə razı olmaq lazımdı, amma ümidimiz böyükdü. Birlikdə çalışacağıq ki, bu durumdan çıxaq.