Rumıniya Türkiyə ilə vacib oyundan öncə zədə xəbərləri ilə sarsılmaqda davam edir.

"Football-plus.az" xəbər verir ki, indi də ''Selta''nın şərəfini qoruyan Andrey Radu zədələnib.

28 yaşlı qapıçı son turda ''Alaves''ə qarşı oyunu (3:4) əvvəldən sona qədər keçirib. Amma ''Selta'' matçın ardından rəsmi paylaşım edərək Radunun zədələndiyini açıqlayıb. Bu təcrübəli qapıçı Rumıniya yığmasının əsas qapıçısı hesab olunur.

Bu, son bir həftədə rumınların ikinci önəmli itkisidi. Martın 15-də ''Piza''nın şərəfini qoruyan Marius Marin də zədələnmişdi. Təcrübəli futbolçu qarşıdakı oyunlarda yığmaya kömək edə bilməyəcək. Radunun nə qədər müddətə sıradan çıxdığı bilinməsə də, Türkiyə ilə oyuna cəmi 3 gün qalıb. Böyük ehtimalla o da İstanbulda komandasına yardım edə bilməyəcək.

Mirça Luçesku ''Rapid''in 26 yaşlı üzvü Marian Ayoani və ''Arceş''in 29 yaşlı üzvü Katalin Kabuz arasında seçim etməli olacaq. Amma bu qapıçıların yığma təcrübəsi çox azdı. Daha öncə Rumıniyanı şərəfini cəmi 3 oyunda qoruyan Ayoani bu mövsüm ''Rapid''də 26 oyunun cəmi 8-də qapısını toxunulmaz saxlayaraq 27 qol buraxıb.

Yığmada debüt etməyən Kaduz isə ''Arceş''də 30 rəsmi oyunun cəmi 5-də qapısını toxunulmaz saxlayaraq 40 qol buraxıb.