Bu mövsüm zədələrdən heç də az əziyyət çəkməyən ''Fənərbaxça'' ilə bağlı növbəti zədə xəbəri var.

''Trabzonspor''la oyundan sonra ayağında ağrılar hiss edən İrfan Can Kahvecinin tibbi müayinəsi zamanı əzələsində yırtıq aşkarlanıb. Türkiyə mətbuatının iddiasına görə təcrübəli futbolçu 3 həftəliyə sıradan çıxıb. İrfan Avropa Liqasında ''Alkmaar''a, eləcə də Türkiyə çempionatında ''Sivasspor'' ilə ''Kayserispor''a qarşı oyunları buraxmalı olacaq. 29 yaşlı vinger Trabzon səfərində ikinci hissədə meydana çıxmış və aktivinə məhsuldar ötürmə yazmışdı.

Bu mövsüm o, ''Fənər''in heyətində 15 rəsmi oyunda 1 qol, 2 məhsuldar ötürmə ilə fərqlənib. Qarşıdakı həftənin yığma həftəsi olduğunu nəzərə alsaq, İrfan böyük ehtimalla Türkiyə yığmasına da yardım edə bilməyəcək. Qardaş ölkəni Millətlər Liqasında noyabrın 16-da Kayseridə Uelsə qarşı vacib oyun gözləyir. Xatırladaq ki, Kahveci ''ay-ulduzlular''ın son iki matçının hər birində qol vurmağı bacarıb.

ƏLİ