Misli premyer-liqasının 25-ci turunda “Karvan-Yevlax” evdə “Zirə”yə uduzdu - 1:0.

“Football-plus.az” xəbər verir ki, meydan sahiblərinin baş məşqçisi Fizuli Məmmədov oyundan sonra jurnalistlərin suallarını cavablayıb.

- Komandamız çox yaxşı oynayırdı. Futbolçular matça ciddi hazırlaşmışdılar. Meydanda döyüşkən komanda var idi. Rəqibdən nə istək baxımından, nə keyfiyyət baxımından, nə də taktiki cəhətdən geriydik. Əksinə, bəzi epizodlarda üstün idik. Düzdü, qapımızda qol epizodları var idi. "Zirə" yaxşı komandadı. Qələbə qazanmaq istəyirdik. Bu gün meydanda yumruq kimi komanda gördüm. Məğlub olmağımız oyuna uyğun deyildi. Sonda səhvdən qol buraxmaq məni məyus edir. İstəmirdim ki, belə əzmkarlıqdan sonra məğlub olaq. Futbolçularım ən azı 1 xala layiq idi. Amma neyləmək olar? "Zirə"ni təbrik edirəm. Öz futbolçularıma isə təşəkkür edirəm. Futbolda səhvlər olur. Bir səhv etdik və ondan da qol buraxdıq. Bizim üçün keçmiş olsun.

- "Karvan-Yevlax" 1-ci liqaya düşsə, vəziyyət necə olacaq?
- Burda elə-belə infrastruktur qurulmayıb. Xeyli maliyyə xərclənib. Bazanın içində futbolçular üçün hər cür şərait yaradılıb. "Karvan-Yevlax" 1-ci liqaya düşsə belə, işlər davam edəcək, komandanın premyer-liqaya qayıtması üçün əzmkarlıq göstəriləcək. Rəhbərliklə heç bir görüşüm olmayıb. Bütün diqqətimiz oyunlaradı. Hər matça qalib gəlib vəziyyətimizi yaxşılaşdırmaq üçün çıxırıq. Stadionun ərazisində təbii örtüklü meydança hazırlanır. Bu işlər görülürsə, deməli, rəhbərliyin bir planı var.

- Bu "Karvan-Yevlax" 1-ci liqa klubu ilə pley-off oynasa, qalib gələ bilər?
- Hazırda bütün diqqət premyer-liqadadı. Çalışırıq ki, burda qalaq. 11-ci yeri tutub pley-off oynasaq, bizim üçün yaxşı olar. Təbii ki, həmin oyunu əldən vermərik.


- Qarşıda "Şamaxı", "Kəpəz" və "Qəbələ" ilə oyunlar var. Komanda həmin matçlarda qələbə qazanmağı bacaracaq?
- Bugünkü oyunla bacararıq. Hər komanda "Zirə" kimi güclü deyil. Qarşıda oyunlar var. Son matça qədər vuruşacağıq. Məşq planımız olduğu kimi davam edəcək.

- Ləğv olunan qolla bağlı fikriniz necədi?
- Rəşad Əhmədov oyunu pis idarə etmədi. Həmin epizoda baxdım. Ola bilər ki, hansısa toxunuş olsun. Amma bu, fol toxunuşu deyil. Futbol təmas oyunudu. Futbolçunun niyyəti topu almaqdı. Topu alan zaman ayaq ayağa, çiyin çiyinə toxunur. Bunlar qayda pozuntusu deyil. Düşünürəm ki, Qavi həmin epizodda təmiz oynadı. Komanda sevindi. Qolu ləğv edəndən sonra ruh düşkünlüyü olur. Bir məşqçi kimi futbolçuların motivasiyasını qaldırmağa çalışdım. Buraxdığımız qol bizə daha pis təsir etdi. Qolumuz sayılmalıydı. Sayılsaydı, bizim üçün daha yaxşı olardı.