"Karvan-Yevlax" Misli premyer-liqasının 22-ci turunda "Qəbələ" ilə heç-heçə etdi - 1:1.

"Football-plus.az" xəbər verir ki, Yevlax təmsilçisinin baş məşqçisi Füzuli Məmmədov oyunsonrası mətbuat konfransında jurnalistlərin suallarını cavablandırdı:

- Çox çətin oyun oldu. Ciddi hazırlaşmışdıq, qalib gəlmək istəyirdik. Meydança bir az sürüşkən idi deyə, bizə çətinlik yaradırdı. Futbolçular meydanda yaxşı vuruşdular. Bizim üçün bir xal da önəmli idi. Komandamız üçün istənilən xal vacibdi. Qalib də gələ bilərdik, uduza da. Hər iki komandaya qarşıdakı matçda uğurlar arzulayıram.

- "Karvan-Yevlax" ən yaxın izləyicisi "Qəbələ"yə uduzmasa da, arada 9 xallıq fərq var. Sizcə, bunun səbəbi nədi?
- Səbəbi zəif oyunlarımızdı, qələbə qazanmamışıq. Mən gələndən sonra bəzi matçlarda yaxşı oynasaq da, məğlub olmuşuq, müdafiədə səhvlər buraxmışıq. İnanın ki, səhvləri aradan qaldırmaq üçün çox çalışırıq. Rəqibi təhlil edirik. Qarşıda matçlar var, çempionat bitməyib. Sona qədər mübarizə aparacağıq. Bilirəm ki, çətin olacaq. Amma məcburuq.

- Futbolçularınız çox vaxt aparırdı. Tapşırığı siz vermişdiz?
- Xeyr. İnanmıram hansısa məşqçi futbolçusuna "yerdə uzan, vaxt apar" tapşırığını versin. Elə şey yox idi. Futbolçudu da, hansısa epizodda güc sərf edir deyə, bərpa olmaq üçün belə şeylər edirlər. Amma məşqçi bu cür şey deməz.