"Karvan-Yevlax" Misli premyer-liqasının 23-cü turunda evdə "Sumqayıt"la heç-heçə etdi - 1:1.

"Football-plus.az" xəbər verir ki, bölgə təmsilçisinin baş məşqçisi Fizuli Məmmədov oyunsonrası mətbuat konfransında jurnalistlərin suallarını cavabladı.

- Maraqlı oyun oldu. Komandalar meydanda döyüşkən futbol nümayiş etdirdi. Hər mövqe uğrunda mübarizə getdi. Futbolçuların döyüşkənliyi mənim üçün xoşdu. Pis olan odu ki, qapımıza iki penalti təyin olundu. Qapımızı toxunulmaz saxlamaq üçün çox çalışırıq. Oyun ərzində rəqibin elə də qol epizodu olmadı. Cərimə meydançasının içində diqqətsizlik etdik. Keçidlər zamanı yaxşı fürsətlər oldu. Amma onları dəyərləndirə bilmədik. Qələbə qazanmaq istəyirdik. Futbolçular çox istəkli idi. Hər birinə təşəkkür edirəm. Qarşıdakı matçlara hazırlaşacağıq.

- Ardıcıl iki oyunda qol vurduz və xal qazandız. Sizdən əvvəl olan rəqiblərlə xal fərqini aradan qaldırmaq mümkün olacaq?
- Hər oyuna ciddi hazırlaşırıq. Həm futbolçular, həm də məşqçilər korpusu olaraq çox ciddi yanaşırıq. Bu matça da qələbə üçün çıxmışdıq. Qalib gələcəyimizə inanırdıq. Təəssüflər olsun ki, cərimə meydançasının daxilində səhv etdik. İki qol vurub qələbə qazanmaq çətin olur. Sevindirici məqam odu ki, komanda iki oyundu məğlub olmur. Xal fərqini aradan qaldırmaq üçün növbəti matçlarda mütləq qələbə qazanmalıyıq.

- Hesab edirsiz ki, qapıçı Pedro Mateuş komandanın yarıdan çoxudu?
- Ondan çox razıyam. Qapıçımız hər oyunda özünü yaxşı tərəfdən göstərir. Qapıçı məşqçisinin də işini dəyərləndirməliyik. Pedro kritik qurtarışlar edir. Amma komandanın əziyyətini də yerə vurmaq istəmirəm.

- Araz Abdullayevin oynamamasının səbəbi nədi?
- Uzun müddət zədəli oldu. Bu oyuna kimi üç məşqdə iştirak edib. Zədədən qayıtdıqdan iki gün sonra yeni eyni yerdən ağrı hiss etdi. Onu müalicəyə göndərdik. Yaxşı müalicə keçdi. Qarşıda oyunlar var. Komandaya kömək etmək üçün çox çalışmalıdı.