ABŞ prezidenti Donald Tramp Qış Olimpiadasında qalib gələn ölkəsinin hokkey yığmasını qəbul edib.

"Football-plus.az" xəbər verir ki, Ağ Evin aparat rəhbərinin müavini Den Skavino Trampın komandanı Oval kabinetdə salamlaması ilə bağlı video yayıb. Oyunçuların əlini sıxan prezident onlara “hər birinizi tanıyıram, böyük adamlarsız” söyləyib. Görüşə qatılan oyunçular əvvəlcə Ağ Evi gəzib, ardından Tramp ilə Oval kabinetdə görüşüb. Forvard Metyu Tkaçak fotosessiya üçün dövlət başçısına qızıl medalını təqdim edib, Tramp isə ona belə cavab verib: “Medalı qaytarmayacam”.

Yığmanın əksər oyunçuları prezidentlə görüş üçün Vaşinqton yollanıb. Ancaq oyunçulardan beşi paytaxtda görünməyib. Bunlar Brok Nelson, Cekson Lakomb, Ceyk Hüntsül, Ceyk Ettinger və Kayl Konnordu. Adı çəkilən hokkeyçilərdən heç biri komandanın səfəri zamanı, Floridada təyyarəyə əyləşərən və Ağ Evdə qəbul zamanı çəkilən şəkillərə düşməyib. “Sportsnet”in insayderi Elliott Fridmanın yaydığı xəbərə görə, Nelson, Hüntsel və Ettinger komandalarının MHL-dəki oyun təqviminə görə tədbirə qatıla bilməyib.

Xatırladaq ki, Olimpiadanın hokkey turnirinin Milanda keçirilən finalında ABŞ yığması overtaymda Kanadaya 2:1 hesabıyla qalib gəlib. Amerikalılar 1980-ci ildən bəri ilk dəfə Olimpiadanın qızıl medalını qazanıb.