"Qələbəyə layiq olan tərəf məhz "İmişli" idi" - Jorj Kaşkilya
"İmişli" Misli premyer-liqasının 21-ci turu çərçivəsində "Şamaxı" ilə qolsuz heç-heçəyə razılaşdı.
"Football-plus.az" xəbər verir ki, Aran təmsilçisinin baş məşqçisi Jorj Kaşkilya matçdan sonra keçirilən mətbuat konfransında oyun barədə fikirlərini bölüşüb. Mütəxəssis rəqibin oyun üslubuna toxunaraq matçın gözlənildiyi kimi ağır keçdiyini qeyd edib:
"Oyun gözlədiyimiz kimi çətin və gərgin keçdi. Bildiyiniz kimi, "Şamaxı" daha çox fiziki futbola üstünlük verir, uzun ötürmələrlə oynayır və tez-tez qayda pozuntuları etməklə oyunun tempini aşağı salmağa çalışır. Bu baxımdan qarşılaşma ciddi taktiki mübarizə şəraitində keçdi".
Mütəxəssis qaçırılan imkanlara görə təəssüfünü gizlətməyib və qazanılan bir xalı itki kimi qiymətləndirib:
"Hesab edirəm ki, bugünkü oyunda qələbəyə layiq olan tərəf məhz "İmişli" idi. Təəssüf ki, istəyimizə tam nail ola bilmədik. Turnir cədvəli baxımından bir xal qazansaq da, oyunun axarını və yaratdığımız epizodları nəzərə alsaq, deyə bilərəm ki, iki xal itirdik. İki dəfə topun dirəyə dəyməsi və bir neçə real qol imkanından yararlana bilməməyimiz nəticəyə birbaşa təsir etdi. Komanda sona qədər mübarizə apardı, son dəqiqələrdə də fərqlənmək üçün çalışdıq, lakin istədiyimiz alınmadı".
Baş məşqçi sonda komandanı tək qoymayan azarkeşlərə də minnətdarlığını bildirib:
"Azarkeşlərimizə xüsusi təşəkkür edirəm. Uzun yol qət edərək komandaya böyük dəstək oldular. Bu gün onlara qələbə sevinci yaşatmaq istəyirdik, amma təəssüf ki, alınmadı. Buna baxmayaraq dəstəklərini əsirgəmədilər və bu, bizim üçün çox dəyərlidi. Onların inamı növbəti oyunlarda daha güclü çıxış etməyimiz üçün bizə əlavə motivasiya verir".
Digər xəbərlər
