''Nottingem Forest''li futbolçu ''Fənər''liləri qəzəbləndirdi - ''Bura cəhənnəm yox, cənnət imiş''
Məlum olduğu kimi Avropa Liqasının pley-offunda ''Fənərbaxça'' evdə gözlənilmədən İngiltərənin ortabab klubu ''Nottingem Forest'' önündə 0:3 hesabı ilə darmadağın oldu. Halbuki İstanbul nəhəngi bu matçın favoriti sayılırdı.
Bu arada ingilislərin sağ cinah müdafiəçisi, bu görüşdə 90 dəqiqə meydanda olan Ola Ayna matçın ardından verdiyi bir açıqlama ilə diqqət çəkib.
"Football-plus.az" xəbər verir ki, komandasının avtobusunda sosial şəbəkədə canlı yayın açan 29 yaşlı futbolçu oyunla bağlı təəssüratları ilə bölüşərkən ''Fənər''lilərin xoşuna gəlməyəcək bir ifadə işlədib.
Qaradərili futbolçu bunları deyib:
''İstanbula gəldik və bizə ''cəhənnəmə xoş gəldiz'' dedilər. Biz də cəhənnəmi gözlədik. Amma bura əslində bizə cəhənnəm kimi yox, cənnət kimi gəldi''.
Aynanın bu sözləri sosial şəbəkələrdə türkiyəli futbolsevərlər arasında böyük müzakirələrə səbəb olub. ''Çelsi''nin yetirməsi olan və 2023-dən ''Nottingem Forest''in şərəfini qoruyan nigeriyalı futbolçu bu mövsüm 15 rəsmi oyunda forma geyib.
Digər xəbərlər
