''Fənər''in oyunçusu səcdə edən ''Trabzonspor''luya tüpürüb?
Məlum olduğu kimi mayın 18-də superliqanın 34-cü turunda ''Fənərbaxça'' öz meydanında ''Trabzonspor''u 3:1 hesabı ilə məğlub etmişdi.
Görüşdə qonaqların yeganə qolunu penaltidən Trezeqe vurmuşdu. Misirli futbolçu qol sevincini səcdə edərək qeyd etmişdi. Daha sonra sosial şəbəkələrdə böyük müzakirələrə səbəb olan bir görüntü yayılmışdı. Belə ki, həmin görüntüdə ''Fənər''in müdafiəçisi Samet Akaydının səcdə edən Trezeqenin yanından keçərkən ona tərəf tüpürdüyü görünür. ''Trabzonspor'' dünən rəsmi bəyanat yayaraq bu futbolçudan Türkiyə Futbol Federasiyasına şikayət ünvanlandığını açıqladı:
''Fənərbaxça'' ilə oyunda Trezeqe qol sevinci zamanı səcdə edərkən Samet Akaydın bilərəkdən oyunçumuza tərəf tüpürüb. Bu çirkin olay kameralara da düşüb. İntizam qaydalarını ağır şəkildə pozan Samet Akaydınla bağlı federasiyaya müraciət ünvanlamışıq. Məsələni sona qədər təqib edəcəyik''.
''Fənərbaxça''ya bu qış ''Adana Dəmirspor''dan gələn 29 yaşlı müdafiəçi sosial şəbəkədə məsələ ilə bağlı açıqlama verərək bunları yazıb:
''Tamamilə idmançı alışqanlığımın bir parçası olan hərəkətimin görüntüsünün yayılmasından sonra ortaya əxlaqsız iddialar atılmasını qınayıram. Sosial şəbəkə vasitəsilə futboldakı rəqabətə və insanlığa bu dərəcədə iftira atanları Allaha həvalə edirəm''.
Bu məsələdə ''Fənərbaxça''nın da hansı mövqeyi tutacağı maraq doğurur.
Digər xəbərlər
