Bilindiyi kimi bu gün Türkiyədə prezident seçkiləri keçiriləcək.

"Football-plus.az" xəbər verir ki, bu üzdən bu həftəsonu qardaş ölkədə peşəkar liqaların heç birində tur oynanılmır. Boşluqdan istifadə edən ''Qalatasaray'' dünən maraqlı bir tədbir keçirib. Klubun bazasında ''ailə günü'' adlı tədbir baş tutub. Futbolçular, klubun işçiləri və rəsmiləri bura ailə üzvləri ilə birlikdə gəliblər. Onlar açıq havada əylənərək birlikdə gözəl vaxt keçiriblər. Tədbirin ən diqqətçəkən anı orda Mustafa Sandalın ''Beni ağlatma'' mahnısı səslənərkən yaşanıb. Bilindiyi kimi bu mahnı son illərdə türkiyəli futbolsevərlər arasında ''Fənər ağlama'' mahnısı kimi populyarlıq qazanıb. Bir çox stadionda ''Fənərbaxça''nı cırnatmaq üçün bu mahnı səsləndirilir və nəqarət hissəsində hamı bir ağızdan ''Fənər ağlama'' oxuyur. Elə ən son ''Girəsunspor''un stadionunda da ''Fənərbaxça'' ilə matçın final fitindən sonra bu mahnı səsləndirilmiş və bu, böyük müzakirələrə səbəb olmuşdu. ''Girəsunspor''un prezidenti ''Fənər''in prezidentinə zəng vuraraq üzr istəməli olmuşdu. ''Qalatasaray''ın dünənki tədbirində yenə bu mahnı səsləndirildi.

Ən maraqlısı odu ki, sosial şəbəkələrdə yayılan videolardan da göründüyü kimi ''Fənər ağlama'' sözünü ''Qalatasaray''ın prezidenti Dursun Özbək də oxuyaraq ürəkdən əl çalıb! Bu görüntülər təbii olaraq ''Fənərbaxça'' fanatları tərəfindən narazılıqla qarşılanıb.