A seriyasında 24-cü tura fevralın 9-də keçirilən iki oyunla yekun vuruldu.

"Football-plus.az" xəbər verir ki, Berqamo və Romada ev sahibləri qalib gəldilər.

Ötən həftəiçi İtaliya kuboku oyununda “Yuventus”u 3:0 hesabıyla məğlub edən “Atalanta”dan fərqli olaraq “Kremoneze”nin çempionat matçına daha yaxşı hazırlaşmaq imkanı olmuşdu. Buna baxmayaraq, berqamolular yorğunluq amilinə görə heç də əziyyət çəkmədilər. Matça hücumlarla başlayan ev sahibləri statdakı fəallığının bəhrəsini ilk hissədəcə kifayət qədər gördülər: əvvəlcə Krstoviç hesabı açdı, Zappakosta isə 12 dəqiqə sonra komandasının üstünlüyünü iki topa çatdırdı.

Bundan sonra oyunun tempini bir qədər azaldan Raffaele Palladinonun komandası fasilədən sonra bir neçə dəfə hesabı darmadağın həddinə çatdıra bilərdi. Lakin imkanlar qaçırıldı və əvəzində qonaq komanda son dəqiqələrdə təsəlli qolunu vurdu. 2:1 hesabıyla qalib gələn “Atalanta” çempionatdakı məğlubiyyətsiz seriyasını 7 oyuna (5 qələbə, 2 heç-heçə) çatdırdı. Xalını 39-a artıran berqamolular 7-ci pillədə qaldılar.

Tura paytaxtdakı matçla yekun vuruldu. “Roma” bu mövsümün ilk dövrəsinin səfər oyununda “Kalyari”yə minimal hesabla məğlub olmuşdu. Praktiki olaraq Çempionlar Liqasına vəsiqə uğrunda mübarizə aparan paytaxt təmsilçisinin bu turnirə iddia edən rəqiblərindən “Yuventus”la xal fərqi 3-ə bərabər idi. Başqa sözlə, sardiniyalılar üzərində qələbə “canavarlar”ı turinlilərə daha da yaxınlaşdıracaqdı. Belə də oldu. Son iki ayda qeyri-sabit çıxışı ilə daha çox yadda qalan Can Pyero Qasperininin komandası bu dəfə ciddi səhvə yol vermədi. Təcrübəli çalışdırıcının start heyətində meydana buraxdığı Malen etimadı doğrultdu. “Aston Villa”dan icarəyə götürülən niderlandlı hücumçu Mançini və Çelikin ötürmələri ilə dubl etdi.

A seriyasındakı 4-cü oyununda qollarının sayını 3-ə çatdıran Doniell “Roma”nın qələbəsində böyük rol oynadı. Paytaxt klubu indi 4-cü yerdəki “Yuventus”dan yalnız topların fərqinə görə geri qalır. Lider “İnter”lə xal fərqi isə 12-yə bərabərdi.

24-cü tur
Atalanta – Kremoneze 2:1
Krstoviç, 13. Zappakosta, 25 – Torsbyu, 90+4. (21796)
Atalanta: Karnesekki, Skalvini, Cimşiti, Kolaşinats (Bellanova, 59), Zappakosta (Kossunu, 59), Ederson, Zalevski (Bernaskoni, 70), Samarciç (Sulemana, 70), Paşaliç, Raspadori (Musa, 78), Krstoviç.

Roma – Kalyari 2:0
Malen, 25; 65. (60334)
Roma: Svilar, Mançini, Ndika, Qilardi, Çelik, Kristante (Əl-Aynaui, 84), Fransa, Pizilli, Lorentso Pelleqrini (Saraqosa, 59), Sule (Venturino, 84), Malen (Arena, 84).

Turun digər oyunlarının nəticələri: Cenoa – Napoli 2:3 (Malinovski, 3-p. Kolombo, 57 – Höylunn, 20; 90+5-p. Maktominey), Bolonya – Parma 0:1
(Ordonyes, 90+5), Fiorentina – Torino 2:2 (Solomon, 51. Ken, 57 – Kazadey, 26. Maripan, 90+4), Sassuolo – İnter 0:5 (Bissek, 11. M.Türam, 28. L.Martines, 50. Akanci, 54. Luis Enrike, 89), Yuventus – Latsio 2:2
(Makkenni, 59. Kalulu, 90+6 - Pedro, 45+2. İsaksen, 47), Verona – Piza 0:0, Leççe – Udineze 2:1 (Qandeman, 5. Banda, 90 – Sole, 26-p.).

“Milan” – “Komo” oyunu fevralın 18-nə təxirə salınıb.

1. İnter - 58, 2. Milan – 50 (23)... 4-5. Yuventus, Roma - 46… 7. Atalanta – 39... 12. Kalyari - 24…15. Kremoneze – 23...

Bombardir: L.Martines (İnter) - 14.

Turun rəqəmi
22 - “Sassuolo”ilə oyunda hesabı 3:0-a çatdıran Lautaro Martines A seriyasında 128-ci qolunu vurdu. Argentinalı hücumçu Milan klubunun bu liqadakı bombardirlərinin siyahısında Alessandro Altobellini arxada qoyaraq 4-cü yerə təklikdə sahib oldu. Lautaronun indi Cüzeppe Meatsa (197), Benito Lorentsi (138) və Stefano Nyersdən (133) geri qaldığını da qeyd edək.

Turun ulduzu
Federiko Dimarko (İnter) - o, “Sassuolo” ilə oyunda “İnter”in 5:0 hesablı qələbəsində ən böyük pay sahibi oldu. Dimarko üç məhsuldar ötürmə ilə Bissek, Markus Türam və Akancinin qol vurmasına şərait yaratdı. Yeri gəlmişkən, Federiko bu mövsüm meydana çıxdığı 21 oyunda 11 dəfə assist etməklə çempionatın lideridi.

Turun sitatı
Daniele De Rossi, “Cenoa”nın baş məşqçisi: