Startı dekabrın 3-də verilən İtaliya kubokunun 1/8 finalında bu həftə daha 4 oyun keçirildi. Bununla da turnirin ən güclü 8 komandası müəyyənləşdi.

Qeyd edək ki, reqlamentə əsasən, A seriyasının son mövsümünü ilk 8 yerdə başa vuran “İnter”, “Milan”, “Yuventus”, “Atalanta”, “Bolonya”, “Roma”, “Latsio” və “Fiorentina” ölkə kubokunda mübarizəyə 1/8 finaldan başladılar. Bu komandalar biroyunluq mübarizədə rəqibləri ilə öz meydanlarında qarşılaşdılar. Dekabrın 3-5-i aralığında baş tutan ilk 4 oyunda “Bolonya” və “Milan”ın qələbəsi gözlənilirdisə, “Fiorentina” ilə “Napoli”nin mübarizəni dayandırması diqqətdən yayınmamışdı.

Bu həftənin oyun proqramı dekabrın 17-də Turindəki matçla başladı. A seriyasında keçirdiyi son 4 oyunu heç-heçə başa vuran “Yuventus” sanki bütün acığını “Kalyari”dən çıxdı. Xatırladaq ki, bu komandalar arasında A seriyasının cari mövsümünün Turində oktyabrın 6-da baş tutan ilk matçı 1:1 hesabıyla nəticələnmişdi. Həmin oyunun 88-ci dəqiqəsində Marin penaltidən yararlanmış və turinlilər ölkə çempionatının 7-ci turunda qapısından ilk qolu buraxmışdı. Bu dəfə sardiniyalılar oyunda ilk real qol şansını yaratsalar da, Di Qreqorio komandasını xilas etdi. Maraqlıdı ki, iki ay əvvəl olduğu kimi, bu dəfə də hesabı Vlahoviç açdı. Matçın ilk yarısını minimal üstünlüklə başa vuran “Yuventus” fasilədən sonra oyuna nəzarəti tamamilə ələ alaraq daha üç cavabsız qol vurdu.

Turnirin son qalibi kimi sonuncu finalçısı da rəqibini böyük hesabla məğlub etdi. “Atalanta”nın B seriyasında çıxış edən “Çezena”nı 6:1 hesabıyla darmadağın etdiyi oyunda De Ketelare ilə Samarciç dubl etdi. Qeyd edək ki, hazırda A seriyasında liderlik edən “Atalanta” bütün turnirlərdə keçirdiyi son 12 oyunda 11-ci qələbəsini qazandı. Can Pyero Qasperininin komandası oktyabrın 26-dan ötən müddətdə yalnız Çempionlar Liqasında “Real”a uduzub (2:3).

Artıq İtaliya kubokunda B seriyası təmsilçisi qalmayıb. Bu liqadan olan “Sampdoriya” paytaxtda 1:4 hesablı məğlubiyyətə uğradı. A seriyası komandalarının oyununda isə “İnter” evdə “Udineze”ni iki cavabsız qolla məğlub edərək sonuncu 1/4 finalçı oldu. Bu mərhələnin oyunları gələn ilin fevralında keçiriləcək.

1/8 final
Yuventus – Kalyari 4:0
D.Vlahoviç, 44. Koopmeyners, 53. Konseysao, 80. Qonsales, 89.
Yuventus: Di Qreqorio, Savona, Lokatelli, Kalulu, Makkenni, Koopmeyners (Qatti, 58), K.Türam, Konseysao (Vea, 81), Yıldız (Qonsales, 66), Mbanqula, D.Vlahoviç (Aciç, 81).
Atalanta – Çezena (D-2) 6:1
Zappakosta, 4. De Ketelare, 8; 35. Samarciç, 27; 71. Breşianini, 54 – Sisey, 90.
Atalanta: Patrisio (Rossi, 78), Cimşiti (Qodfri, 64), Hin (Sulemana, 64), Toloy, Samarciç, De Ketelare (Zanyolo, 52), Zappakosta, Paşaliç (Breşianini, 52), De Roon, Palestra, Retegi.
Roma – Sampdoriya (D-2) 4:1
Dovbik, 9; 19. Baldantsi, 24. Şomurodov, 79 - Yepes, 61.
Roma: Rayan, Ndika, Ermoso, Anxelinyo, Çelik, Zalevski (Dal, 71), Baldantsi, Pizilli (Le Fe, 62), Paredes (Lorentso Pelleqrini, 71), Salemakers (Sule, 62), Dovbik (Şomurodov, 78).
İnter – Udineze 2:0
Arnautoviç, 30. Asllani, 45+2.
İnter: X.Martines, Darmian, Bissek, Bastoni (Dyumfris, 63), Bükünen (Palasios, 74), Auqusto, Frattezi (Aydu, 89), Asllani (Çalhanoğlu, 63), Zyelinski, Arnautoviç (Lautaro Martines, 63), Taremi.

Mərhələnin digər oyunlarının nəticələri: Bolonya – Montsa 4:0 (Pobeqa, 32. Orsolini, 35. Dominges, 63. Kastro, 77), Milan – Sassuolo (D-2) 6:1 (Çukvueze, 12; 21. Reynders, 17. Leao, 23. Kalabriya, 56. Abraham, 62 – Mulattyeri, 69), Fiorentina – Empoli 2:2, p. – 3:4 (Ken, 59. Sottil, 71 – Ekonq, 4. Espozito, 75), Latsio – Napoli 3:1 (Noslin, 32; 41; 50 – Simeone, 36).

2025-ci il fevralın 5-də keçiriləcək 1/4 final oyunlarında cütlər belə formalaşıb: Yuventus – Empoli, Bolonya – Atalanta, Milan – Roma, Latsio - İnter.