Azərbaycan cüdoçuları Balabəy Ağayev (60 kq) və Zelim Tskayev (81 kq) Parisdə keçirilən “Böyük Dəbilqə” seriyalı turnirdəki uğurlu nəticələrdən sonra dünya reytinqinin ilk “5-liy”inə daxil olub.

"Football-plus.az" xəbər verir ki, Beynəlxalq Cüdo Federasiyası (IJF) “Böyük Dəbilqə”nin yekunlarına əsasən planetin ən güclü cüdoçularının yeni reytinq siyahısını açıqlayıb.

Xatırladaq ki, həmin turnirdə Azərbaycan cüdoçuları üç medal qazanıb. Balabəy Ağayev (60 kq) turnirin qalibi olub, Zelim Tskayev (81 kq) gümüş, Ruslan Paşayev (66 kq) isə bürünc medal qazanıb.

Nəticədə 4090 xal toplayan Balabəy beş pillə irəliləməklə 4-cü yerə yüksəlib. 3-cü pillədə qərarlaşan yaponiyalı Ryuju Nagayamadan azərbaycanlı cüdoçunu cəmi 80 xal ayırır ki, bu da cüdo meyarlarına görə minimal fərq sayılır. Zelim üç pillə yüksələrək 4365 xalla dünya reytinqində 2-ci yeri tutub. Bu çəkidə lider 5855 xalı olan rusiyalı Timur Arbuzovdu. Parisdə qazanılan bürünc medal Ruslana da müsbət təsir göstərib. O, 3151 xalla 9-cu yerdən 7-ci pilləyə yüksələrək ilk “10-luq”da mövqeyini möhkəmləndirib.

“Böyük Dəbilqə”ni buraxan olimpiya çempionu Hidayət Heydərov (73 kq, 3836 xal) iki pillə geriləməklə 4-cü yerə düşüb. Elcan Hacıyev (90 kq, 3246 xal) 3-cü pillədə qalıb, Zəlim Kotsoyev (100 kq, 4868 xal) 2-ci yeri qoruyub, Uşanqi Kokauri (100 kq-dan yuxarı, 3726 xal) isə yenə yeddincidi.