Misli premyer-liqasının 20-ci turunda “Qəbələ” evdə “Sabah”a məğlub oldu - 0:1.

“Football-plus.az” “qırmızı-qaralar”ın məşqçisi Georgi Çixradzenin oyunsonrası mətbuat konfransından hesabatı təqdim edir.

- "Sabah"la biz fərqli məqsədlər uğrunda mübarizə aparan komandalarıq. Onlar çempionluq uğrunda, biz isə elitada qalmaq uğrunda oynayırıq. Oyunu iki fərqli hissəyə bölərdim. İlk yarıda bir az passiv oynadıq. İkinci hissədə daha yaxşı oyun nümayiş etdirdik. İkinci yarının əvvəlində adi vəziyyətdə qol buraxdıq. Qol buraxılmamalı epizod idi. Hesabda geri düşəndən sonra daha aqressiv oynamağa başladıq. Matçın sonlarında qol vurduq. Mübahisəli epizoddu. Sonda məğlub olduq.

- Sayılmayan qolunuzla bağlı fikirləriniz necədi?
- Bizim fikrimizcə, qol təmiz idi. Kimlərsə də baxıb, dəyərləndirə bilər. Düşünürəm ki, qol qaydalar çərçivəsində vurulmuşdu.

- Start heyətindəki cinah müdafiəçilərini dəyişməyi düşünmürsüz?
- Turan Manafov yeni gəlib, hələ ideal formada deyil. Yavaş-yavaş formaya düşməyə başlayır. Sağ cinahda Nicat və Eşqin var. Bəzən biri, bəzən digəri oynayır. Arada Nuğayı da o mövqedə oynadırıq. Həmin cinahdakı resurslarımızdan maksimum istifadə etməyə çalışırıq.

- Rüfət Əhmədova şans verilmir. Onunla bağlı planınız nədi?
- Onu transfer edəndə düşünürdük ki, cinahda bizə kömək edəcək. Rüfət əvvəllər burda oynayıb, onu tanıyırdıq.

- Getməyi düşünmür?
- Əvəzedici heyətlə məşq edirdi. Ona dedik ki, təklif varsa, gedə bilər. Vəziyyət elə alındı ki, komandada qaldı.

MÜZƏFFƏR QULUZADƏ