“Maraqlananlar var, təkliflər gəlir” – Qurban Qurbanov bu gün, “Kəpəz”ə məğlubiyyətin ardından keçirilən mətbuat konfransında “Bəhlul Mustafazadə üçün Çin klubundan təklif gəlib” sualının cavabında belə dedi. Hocanın qırımından da hiss olundu ki, mümkün ayrılığa mənəvi-psixoloji cəhətdən hazırdı. Düzü, indi məni düşündürən əsas sual budu ki, görəsən, Bəhlul “Ayntraxt”ın qapısından həlledici qolu keçirməsəydi, “Qarabağ”ı faktiki pley-offa çıxarmasaydı, transfer söhbəti bu qədər aktuallaşacaqdımı, yoxsa Mustafazadə hələ də özünü Ağdam klubuna borclu hiss edəcəkdi? Bu sualı qəlbimin dərinliyində “dəfn edib”, başqa məsələ ilə bağlı fikirlərimi bölüşmək istəyirəm.
Əcəba, Bəhlul Çinin hansı klubuna gedir? Mənə elə gəlir ki, burda məsələ yüzdəyüz aydındı – ölkənin üçqat çempionu, “transfermarkt”da dəyəri 18 milyon avroya yaxın olan “Şanxay Şenhua”ya. Deyə bilərsiz ki, niyə, məsələn, son üç ilin (2023, 2024, 2025) çempionu “Şanxay Port”a yox, “Şanxay Senhua”ya? Ona görə ki, 2023-cü ilin dekabrından bəri Şanxay klubunu Leonid Slutski çalışdırır. Bəli-bəli, Samir Əliyevin şəxsində azərbaycanlı futbolçuların potensialına yetərincə yaxşı bələd olan 54 yaşlı rusiyalı mütəxəssis. Xatırladım ki, Samir 2003-04-cü illərdə “Volın”la Ukrayna çempionatında “at oynadırdı”, amma Kirsan İlümjinovun pulunun parıltısına aldanıb elitanı Rusiyanın 1-ci liqasına – “Uralan”a dəyişdi. Elə həmin səhv qərarla da karyerasını məhv etdi, sonradan müsahibələrinin birində də səhvini boynuna aldı. Ancaq bu həyatda sonrakı peşmançılığın fayda verdiyini hələ bir adam da görməyib. İndi də Bəhlul – müstəqil futbolumuzun ən parlaq yetirmələrindən biri Slutskinin yanına gedir. Təki taleyi Samirin taleyinə oxşamasın! Təki Çinə yox, Avropanın hansısa ortabab klubuna getsin!
HUŞƏNG