Zarafat-zarafat, amma “Sabah” məhz bu mövsüm çempion ola, hətta bəlkə “qızıl dubl” edə biləcəyinə ciddi şəkildə inanır! Addımlar, hərəkət tərzi, davranış – başdan-ayağa çempion olmağa, indidən özünü ictimaiyyətə gələcəyin çempionu kimi tanıtmağa yönəlib.

Onsuz da heyətin gücləndirilməsi ilə bağlı addımlar hər kəsə bəllidi. Umarali Raxmonaliyevi, Aaron Maludanı “özəlləşdirdilər”, indi də Velko Simiçlə bağlı eyni planı qururlar. Güman ki, bu hədəfə də çatacaqlar – pul olandan sonra nə var ki?!

Səhər işdə uşaqlara deyirəm ki, Valdas Dambrauskas “Sabah”ı “Şən və hazırcavablar klubu”na çevirib. Gerçəkdən hər şeydə səviyyə duyulur: oyunçuların təqdimatında, klubun adının ünlü azərbaycanlılarla əlaqələndirilməsində, adicə futbolçuların sosial şəbəkə izlədiyimiz zarafat və oyunlarında da. Güman ki, burda litvalı mütəxəssisin də xüsusi rolu var. Axı Dambrauskas da viktorina, intellektual oyunlar həvəskarıdı, vaxtilə “Kim milyonçu olmaq istəyir?” oyununda da iştirak edib.

İndi isə “Sabah”ın yeni əyləncəsi ilə tanış olaq. Deməli, paytaxt klubu “Liverpul”, “Atletiko”, Dortmund “Borussiya”sı, “Ayaks” ilə çalışan aut üzrə mütəxəssis Tomas Qronnemarkı birhəftəliyə Bakıya gətirib. Təbii ki, gəzməyə yox. Danimarkalı burda olduğu müddətdə “Uzun, sürətli və ağıllı aut atışları” fəlsəfəsi əsasında “Sabah”ın oyunçularına standart vəziyyətdən daha yaxşı yararlanmağı öyrədib. Həmin bu Qronnemarkın indi hansı klubla daimi əsasda çalışdığını bilirsizmi? Bu gün bəlkə də dünyada standart vəziyyətlərdən ən yaxşı yararlanan “Arsenal”da!

“Qarabağ” azarkeşlərini zərrəcə qorxutmaq istəmirəm. Amma bu “Sabah”, bu Dambrauskas məhz bu mövsüm çempion olmaq üçün əlindən gələn və gəlməyən hər şeyi edir. Birhəftəliyə aut mütəxəssisi gətirmək nə deməkdi, mən ölüm?! Ədəbazlıqdı, hoqqabazlıqdı, çempionbazlıqdı, ya nədi? Bu komandadan qorxmayan da qorxmağa başlasın!

ORXAN