Fransa çempionatının 17-ci turunda PSJ doğma meydanda “Paris”i qəbul edirdi. Paris derbisində favorit sayılan meydan sahibləri 2:1 hesabıyla qalib gəldi. Bununla da liderlik kürsüsünü əldən vermiş PSJ 1-ci pillədəki “Lans”ı izləməyə davam etdi.

Birincilik uğrunda mübarizə aparan bu komandalar arasında xal fərqi indi birə bərabərdi. PSJ hazırda Avropanın ən güclülülərindəndi, qatıldığı bütün turnirlərdə favorit sayılır. Bu komandanın bizim üçün maraqlı olan daha bir cəhəti odu ki, PSJ-nin heyətində qonşu Gürcüstan futbolunun təmsilçisi Xviça Kvaratsxeliya forma geyir. Düzdü, sonuncu qarşılaşmada gürcü futbolçu ehtiyatda qaldı, meydana çıxmadı. Amma məlum məsələdi ki, PSJ-nin baş məşqçisi Luis Enrike zəif rəqiblə qarşılaşmada aparıcı futbolçuların köməyinə ehtiyac duymayıb. Təcrübəli çalışdırıcı ehtiyatda saxladığı Xviçaya bu bayram günlərində istirahət üçün əlavə imkan yaradıb.

Hələ irəlidə çox oyun var, məlum məsələdi ki, Kvaratsxeliya bundan sonra PSJ-nin qələbələrində pay sahibi olacaq. Bununla da gürcü futbolçu Avropadakı legioner karyerasını uğurla davam etdirəcək. Eləcə də Qafqazın digər ölkələrinin dünyanın dörd bir yanına səpələnmiş legionerləri. Kvartsxeliya bu çoxsaylı futbolçulardan yalnız biridi. Heç şübhəsiz, ən tanınmışdı. Amma başqalarının da günü heç də pis deyil. Hərəsi bir klubda başını aşağı salıb futbolunu oynayır. Son vaxtlar bizə heç də yad sayılmayan Özbəkistanın yetirməsi olan futbolçular da özlərini ən yaxşı tərəfdən göstərirlər. Özbək futbolçuların sorağı İngiltərədən, İtaliyadan, hətta qardaş Türkiyədən gəlir. Çox təəssüf ki, məşhur misrada deyildi kimi, imzalar içində imzamız yoxdu.

Yeni ilin ilk günlərində yenidən bu qanqaraldıcı mövzuya toxunmağım səbəbsiz deyil. Təəssüf ki, illər bir-birini əvəzləyir, yaşımızın üstünə yaş gəlir. Di gəl ki, azərbaycanlı futbolçuların legioner kimi uğur qazanmasına bəslədiyimiz ümidlər doğrulmur, qulağımız hələ də xoş soraq arzusundadı. Yaxşı yadımdadı, Emin İmaməliyevin “Trabzonspor”ın təlim-məşq toplanışına dəvət olunmasını, “Qaradəniz fırtınası” ilə birlikdə hazırlıq keçməsini TRT ekranında görəndə xeyli sevinmişdim. Onda mənim heç 20 yaşım olmazdı. O zamandan bəri Kamran Ağayevdən tutmuş Mahir Emreliyə kimi neçə-neçə azərbaycanlı futbolçunu xaricə böyük ümidlərlə yola salmışıq. Təəssüf ki, bu futbolçuların heç biri ümidlərimizi doğrultmayıb. Hər dəfə də ümidlərimizi növbəti dəfəyə saxlamışıq.

Buyurun, hazırda Avropada karyerasını davam etdirən iki futbolçumuzdan gələn xəbərlərə diqqət yetirək. Birincisi Mahir Emrelidi. Hazırda fərdi məşqlər edən 28 yaşlı hücumçunun iki-üç həftə sonra meydana çıxa biləcəyi gözlənilir. Almaniyanın "Kayzerslautern" klubunda çıxış edən və zədəsi yeni sağalan Azərbaycan millisinin futbolçusu əlavə testlərdən keçəcək. Bu yerdə onu da xatırladaq ki, həmyerlimiz ötən ilin noyabrında "Herta" ilə keçirilən oyunda zədələnib. O, mövsümün ilk yarısında 2-ci bundesliqada cəmi 4 matçda meydanda olub. Forvardın adı həmçinin bir neçə qarşılaşmanın iştirak ərizəsinə salınmayıb.

Yayda böyük ümidlərlə Xorvatiyaya yola saldığımız Rüfət Abdullazadə ilə bağlı da ürəkaçan nəsə yoxdu. Rüfət sonuncu dəfə noyabrın 9-da meydanda olub. Özü də cəmi bir dəqiqə. O zamana qədər olan statistika da gələcəyə ümidlə baxmağa əsas vermir. Bəlkə də elə bu statistikaya görə Abdullazadə məşqçinin etimadını qazanmağa çətinlik çəkir. Belə ki, Rüfət ilk 18 turda cəmi 9 matçda forma geyib və cəmi iki məhsuldar ötürməylə yadda qalıb. Həmyerlimizin vurduğu yeganə qol isə ölkə kubokuna təsadüf edir. Bu gedişlə Rüfətin tezliklə “Kəpəz”də peyda olacağı gözləniləndi.

Bir sözlə, qonşularımız şir-pələng saxlayır, soraqları PSJ-dən, “Mançester Siti”dən, “Liverpul”dan gəlir. Bizimkilərin isə günü ehtiyat oyunçular skamyasında keçir. Nə qədər ki, bu durum acı reallıqdı, milli komandalarımızın nəticələrində də müsbət dəyişiklik gözləməyə dəyməz.

AMAL