İspaniyanın nəhəng klubları arasında yaşanan çoxlu münaqişə mövzusuna daha biri əlavə olunub.

"Football-plus.az"ın məlumatına görə, “Real” İspaniya Kral Futbol Federasiyasının (RFEF) texniki hakimlər komitəsinin sabiq vitse-prezidenti Xose Mariya Neqreyranın işinə görə “Barselona”dan çoxmilyonluq kompensasiya almaq niyyətinə düşüb. Bununla bağlı xəbəri “As” yayıb.

Bu nəşrin yazdığına görə, Madriddə “göy-qırmızılar”a qarşı böyük məbləğdə iddia qaldırmağın mümkünlüyünü nəzərdən keçirirlər. “Kral klubu”nun rəhbərliyi belə hesab edir ki, korrupsiya liqada mübahisəli hakim qərarlarına səbəb olub və ispan futbolunun bütövlüyünə xələl gətirib.

Xatırladaq ki, söhbət 2023-cü ilin fevralında üzə çıxan qalmaqaldan gedir. Onda media belə bir məlumat yaymışdı: “Barselona” uzun illər ərzində texniki hakimlər komitəsinin sabiq vitse-prezidenti Xose Mariya Neqreyraya pul ödəyib. Nəticədə bu fakt təsdiqləndi. “Barselona”ya və rəhbərliyə rüşvətxorluqla bağlı ittiham irəli sürüldü. İstintaq klubun 2001-18-ci illər aralığında adı çəkilən şəxsə 8,4 milyon avro ödəməsini cinayət saydı. Neqreyranın dediyinə görə, yalnız kataloniyalıların hakim qərarları ilə bağlı məsələlər üzrə kənar məsləhətçisi olub. O, hakimlərə təsir göstərmək məqsədi ilə rüşvət almaq ittihamını rədd etdi. “As”ın yazdığına görə, Madriddə məhkəmənin qərarından narazı qalıblar və araşdırmanın davam etdirilməsini istəyirlər. “Reaş” işi başa çatdırmağa hazırdı: klub rəhbərliyi artıq məhkəməyə 10 gün ərzində lazımi yoxlamalar aparmaq və “göy-qırmızılar”ın maliyyə əməliyyatları haqda hesabatlar təqdim etmək tələbi ilə üz tutub.

Madrid klubu “Barselona”nın 2010-21-ci illəri əhatə edən daxili auditi ilə bağlı bütün sənədləri, klubun maliyyə fəaliyyəti haqda illik hesabatları, həmçinin göstərilən dövr üçün vergi komitəsinin iclaslarının protokollarını tələb edir. “Real” ümumilikdə 625 sənəd istəyir.

Neqreyranın işi ilə bağlı yeni dinləmələr yanvarın 27-də keçiriləcək. Hazırda şahidlərin sorğu-suala tutulması davam edir. Dekabrda klubun indiki prezidenti Xuan Laporta da ifadə verib. 2021-ci ildən bəri prezident olan Laportanı istintaq bir müddət əvvəl ittiham olunanlar sırasından çıxarıb.
Laportadan ödənişlərlə bağlı məlumatlı olub-olmaması, həmin ödənişlərin gerçəkləşməsi haqda qərarı kimin verməsi, Direktorlar Şurasının bu məsələdən nə dərəcədə xəbərdar olması soruşulub. “Real”ın hüquqşünaslarını düşündürən daha bir vacib sual var: niyə belə nəhəng müqavilələr birbaşa yox, üçüncü şəxslər və qapalı şirkətlər vasitəsi ilə bağlanılıb? Hələ ki bu suala cavab verən yoxdu.