Laporta: “Barselona”nın maraqlarına zərbə vurmaq üçün kampaniya aparılır”
“Neqreyra işi” ilə bağlı qalmaqal daha geniş vüsət alıb. Artıq “Barselona” rəsmi ittihamla üzləşib.
"Football-plus.az" xəbər verir ki, İspaniya prokurorluğu bu kluba 2001-18-ci illər ərzində İspaniya Futbol Federasiyasının Texniki Hakimlər Komitəsinin sabiq vitse-prezidenti Xose Mariya Enrikes Neqreyraya 7,3 milyon avro ödəməsi ilə bağlı ittiham irəli sürüb. “Barselona”nın iki sabiq prezidenti Xosep Bartomeu və Sandro Rosell, həmçinin menecerlər Albert Soler və Oskar Qrau da korrupsiya ittihamı ilə üzləşiblər. Bu şəxslər məhkəmədə cavab verməli olacaqlar. Yerli mənbələr “Barselona”nın İspaniyada idman və maliyyə planlarında sanksiyalardan qaça bilməyəcəyini vurğulayırlar. UEFA isə komandanın avrokubokların növbəti mövsümündə iştirakına qadağa qoya bilər. Qitə futbol təşkilatı korrupsiyada ittiham olunan “Barselona”nın iştirakına görə qitə kuboklarının nüfuzunun aşağı düşəcəyini hesab edərsə, komandanı avrokuboklardan kənarlaşdıra bilər. “As” qəzetinin yazdığına görə, təşkilatın rəhbərliyi “Neqreyra işi” ilə bağlı yekun hökm çıxarılana qədər “Barselona”nın qitəmiqyaslı turnirlərdə iştirakına bir mövsümlük qadağa qoymağı düşünür. Yeri gəlmişkən, “Barselona” bu mövsüm artıq avrokuboklarda mübarizəni dayandırıb.
Klubun prezidenti Xuan Laporta ittihamlar barədə fikirlərini “tvitter” hesabında belə ifadə edib:
“Barselona” ittiham olunduğu məsələdə günahkar deyil. Klub gözdənsalma kampaniyasının qurbanı olub. Bunda təəccüblü heç nə yoxdu, biz “Barselona”nı müdafiə edəcək və klubun günahsız olduğunu sübut edəcəyik. Çoxları öz səhvlərini düzəltməli olacaqlar. Bu məsələ ilə bağlı mətbuat konfransı keçirəcəyik. Hələlik isə fikirlərimi qısaca ifadə edirəm. “Barsa” heç vaxt hakimləri ələ almayıb və belə işə bundan sonra da əl atmayacaq. Heç vaxt. Klubumuzun maraqlarına zərbə vurmaq üçün kampaniya aparılır. Bu kampaniyada kluba nəzarət etmək niyyəti güdülür”.
Bazar günü “Real” əzəli rəqibinin korrupsiyada ittiham olunması ilə bağlı bəyanat yayıb:
“Real”ın idarə heyəti bu gün keçirilən iclasında prokurorluğun “Barselona”ya və klubun sabiq rəhbərlərinə qarşı irəli sürdüyü ciddi ittihamları nəzərdən keçirib. “Real” faktların ciddiliyindən dərin narahatlığını ifadə etmək istəyir və hüquq sisteminə güvəndiyini bir daha bəyan edir. Klub qanuni hüquqlarını müdafiə edərək hakim prosesi bütün tərəflər üçün açdığı zaman məhkəmədə iştirak etməyə razıdı”.
Yerli mənbələr bu bəyanatın “Barselona” rəhbərliyində narazılıq doğurduğunu vurğulayır.
Digər xəbərlər
