Barselona məhkəməsi eyniadlı klubu sevindirən qərar verib.

“Football-plus.az” xəbər verir ki, korrupsiyada ittiham olunan “Barselona” bəraət alıb.

EFE agentliyinin yaydığı məlumata görə, Kataloniya klubu “Neqreyra işi”nə görə uzun müddət aparılan təhqiqatın və məhkəmə işinin sonunda təmiz adını müdafiə edə bilib. Xatırladaq ki, yerli mənbələr 2023-cü ilin fevralında İspaniya Kral Futbol Federasiyasının Texniki Hakimlər Komitəsinin sabiq vitse-prezidenti Enrike Neqreyranın “Barselona” ilə gizli “əməkdaşlıq” etməsi haqda sensasion məlumatlar yaymışdı. İddiaya əsasən, o, 2016-18-ci illərdə hakimlərlə bağlı lazımi məlumatları təqdim etməsinin əvəzində bu klubdan təxminən 1,4 milyon avro almışdı. Lakin məhkəmə bir müddət əvvəl açıqlanan Antikorrupsiya Prokurorluğunun mövqeyi ilə razılaşıb. Beləliklə, “Barselona”nın sabiq rəhbərlərinin üzərindən korrupsiya ittihamı götürülüb. Klubun “Neqreyra işi”nə görə sanksiyalara məruz qalmayacağı rəsmən açıqlanıb.