“Barselona” rəhbərliyi UEFA-dan gələ biləcək mümkün sanksiya haqda ciddi düşünür. İspaniya klubu Avropadan Asiyaya üz tuta bilər.

“Football-plus.az” xəbər verir ki, “Barselona”nın “Neqreyra işi” ilə bağlı aparılan istintaqda qayda-qanunları pozduğu sübuta yetirilərsə, komanda Avropadan kənarda keçirilən beynəlxalq turnirlərdə iştirak edə bilər. “Diario Sport”un yaydığı xəbərə görə, Kataloniya təmsilçisi Çempionlar Liqası və La Liqadan bir mövsümlük kənarlaşdırıla bilər. “Barselona” qadağa tətbiq olunacağı halda Asiya yarışlarında iştirak edə bilər. Rəhbərlik klubun Asiya Futbol Konfederasiyasının turnirlərində iştirak imkanlarını öyrənir.

Xatırladaq ki, Barselona prokurorluğu kluba və onun sabiq prezidentləri Xosep Bartomeu ilə Sandro Rosellə qarşı Texniki Hakimlər Komitəsinin keçmiş vitse-prezidenti Xose Mariya Enrikes Neqreyraya ödənişlərdə mümkün korrupsiya faktı ilə bağlı iddia qaldırıb. Klubun 2001-18-ci illərdə Neqreyranın hesabına 7,3 milyon avro köçürdüyü məlum olub. Bu ödənişin rüşvət olduğu iddia edilir.