“Barselona”nın ÇL-də iştirakı hələ də sual altındadı
Həmişə olduğu kimi, “Barselona” ətrafında yaşanan proseslər yenə də diqqət mərkəzindədi.
“Football-plus.az” xəbər verir ki, klub rəhbərliyi çərşənbə günü “Nou Kamp”da Serxio Busketslə vida mərasimi keçirdi. Xatırladaq ki, mövsümün sonunda müqavilə müddəti bitəcək 34 yaşlı yarımmüdafiəçi klubdan ayrılmağa qərar verib. Çərşənbə günü “Barsa” camiəsi onun uzun illər ərzində göstərdiyi xidmətə minnətdarlıq etmək üçün yığışmışdı. Komandanın indiki oyunçuları, əfsanələri, məşqçi korpusunda çalışanlar səbəbkarın şərəfinə çox xoş və duyğulandırıcı ifadələr işlətdi. Maraqlıdı ki, mərasimə təkcə həyatı Kataloniya klubu ilə bağlı olanlar qatılmamışdı. “Real”ın vitse-prezidenti Emilio Butragenyo da iştirakçılar arasında idi. Ən yaddaqalan çıxışlardan biri də ona məxsusdu:
“Busketsin möhtəşəm karyerasına hörmətimizi ifadə etmək üçün, əlbəttə, biz də burda olmalıydıq. O, “Real” üçün həm hücumda, həm də müdafiədə əla rəqib idi. Buskets “Barselona”nın uğurlarında həlledici rol oynayıb. Serxio “el-klasiko”da iştirak sayına görə rekordçudu, personası bütün İspaniya futboluna təsir göstərib. “Real” ona böyük hörmətlə yanaşır ki, bu da “Barselona” üçün nə dərəcədə böyük futbolçu olmasının təsdiqidi”.
Doğrudan da, hörmət rəqabətdən üstündü. Butragenyonun dedikləri möhtəşəm futbolçunun əməyinə qiymət vermək üçün işlədilən gözəl sözlərdi.
Ancaq “Barsa”nın indiki həyatı təkcə bayram ab-havasına bürünməyib. İş ondadı ki, klub hələ də Çempionlar Liqasının iştirakçıları sırasından uzaqlaşdırılmaq təhlükəsindən qurtulmayıb. Bildiyiniz kimi, bir müddət əvvəl Barselona Prokurorluğu klub haqda İspaniya Kral Futbol Federasiyasının Texniki Hakimlər Komitəsinin sabiq vitse-prezidenti Xose Mariya Enrikes Neqreyraya ödənişlər zamanı mümkün korrupsiya halları ilə bağlı məhkəmə iddiası qaldırıb. “Barsa” iddia edir ki, Neqreyraya yalnız 2001-18-ci illər aralığında hakimlər haqda hesabat hazırladığını görə 7,3 milyon avro ödəyib.
ABC-nin yaydığı xəbərə görə, UEFA-nın iki müfəttişi öz hesabatında belə nəticəyə gəlib ki, “Barselona” “Neqreyra işi”nə görə birmövsümlüyə Çempionlar Liqasında iştirakdan uzaqlaşdırılmalıdı. Amma bu mövzuda yekun qərarın yaxın həftələrdə açıqlanacağı gözlənilir. Xəbərdə o da bildirilir ki, UEFA-nın prezidenti Aleksander Çeferin artıq müfəttişlərin hesabatını oxuyub və indi sonrakı addımlar haqda düşünür. “Barselona”ya qarşı iş açmaq və İspaniya məhkəməsinin qərarını gözləmək, yoxsa elə indi komandanı ÇL-dən uzaqlaşdırmaq – yol ayrıcında qalıb...
Maraqlıdı ki, Kataloniyanın “Diario Sport” qəzeti də klubdakı qaynaqlara istinadla “Barsa”nın ÇL-dən uzaqlaşdırılmasının mümkünsüzlüyünü iddia edir. Düzdü, klub artıq ÇL-in növbəti mövsümündə iştirak üçün lazım olan lisenziyanı alıb.
