“Neqreyra işi” UEFA-nın da diqqətini cəlb edib. Qitə futbol qurumu “Barselona”nın hakimlərə rüşvət verməsi şübhəsi ilə bağlı təhqiqata başlayıb.

“Football-plus.az” xəbər verir ki, UEFA-nın rəsmi saytındakı məlumatda belə bildirilib: “UEFA İntizam Qaydalarının 31-ci (4) maddəsinə uyğun olaraq, “Neqreyra işi” ilə bağlı “Barselona” futbol klubunun potensial qanun pozuntularını araşdırmaq üçün etika və intizam müfəttişləri təyin edilib”.

Xatırladaq ki, Barselona prokurorluğu kluba və onun sabiq prezidentləri Xosep Bartomeu ilə Sandro Rosellə qarşı İspaniya Futbol Federasiyasının Texniki Hakimlər Komitəsinin keçmiş vitse-prezidenti Xose Mariya Enrikes Neqreyraya ödənişlərdə mümkün korrupsiya faktı ilə bağlı iddia qaldırıb. Araşdırma davam edir. UEFA-nın təhqiqatı “Barselona”nın məlum şəxsə və onun vasitəçiliyi ilə hakimlərə rüşvət verdiyini təsdiqləyəcəyi halda komanda azı bir mövsümlük avrokuboklara buraxılmaya bilər. Yeri gəlmişkən, İspaniya nəhəngi artıq qitə kuboklarının cari mövsümündə mübarizəni dayandırıb.