“Təbii ki, nəticə biz azarkeşlər üçün ağır oldu. Amma bizi daha çox narahat edən hesabdan çox oyunun gedişində oyunçuların istəksiz və xaotik oyunu idi. Azarkeş olaraq başa düşürük ki, klub uda da bilər, uduza da. Amma meydanda mübarizə görmək istəyirik. Düşünürük ki, son oyunda məhz bu mübarizə çatmadı. Ayxan Abbasovun dövrü ilə indiki dövrü birbaşa müqayisə etmək düzgün olmaz. Şərait, heyət, gözləntilər fərqlidi. Ayxan Abbasovun vaxtında komanda daha çox elitada qalmağa oynayır və bunun öhdəsindən gəlirdi. Kurban Berdıyevin dövründə isə nəticə baxımından irəliləyiş var. Amma azarkeş üçün ideal ssenari odu ki, həm nəticə olsun, həm də meydanda gözəl oyun görəsən. Avrokubok hədəfi olan klub üçün sabitlik çox vacibdi və biz də anlayırıq ki, baş məşqçiyə zaman lazım ola bilər. Amma zaman kor səbr demək deyil. Azarkeşlər prosesin hara getdiyini görmək istəyir. Bizim mövqeyimiz sadədi: nəticələr avrokubok məqsədinə uyğun gəlirsə, səbr də var. Lakin qrupumuzun daxilində baxımlı oyunu nəticədən üstün tutan azarkeşlər də çoxdu. Baxımlı oyun və nəticəni görmədikdə isə bunu demək və etiraz etmək azarkeşin ən təbii haqqıdı. Bizim azarkeş qrupunda əsas dəyər “Turan Tovuz”a olan sevgidi və bütün məsələləri bu çərçivədə dəyərləndiririk”.