''Samsunspor''un prezidenti ''od püskürdü'' - ''Hakimlər ''Qalatasaray''a yardım edir''
''Qalatasaray''ın ''Samsunspor''u 3:2 məğlub etdiyi qarşılaşmaya son anlardakı epizod damğa vurdu.
"Football-plus.az" xəbər verir ki, əsas vaxta əlavə olunmuş 7-ci dəqiqədə ''Samsunspor''un sağ cinahdan hücumu zamanı top ''Qalatasaray''ın sol müdafiəçisi Kazımcan Karataşın əlinə dəydi. Əl açıq vəziyyətdə olduğundan hər kəs hakimin VAR tərəfindən monitora dəvət olunacağını və penalti təyin edəcəyini düşündü. Amma 2 dəqiqədən çox davam edən VAR incələməsindən sonra hakim monitora dəvət olunmadı və final fiti səsləndi.
Epizod sosial şəbəkələrdə çox böyük müzakirələrə səbəb oldu və ''Qalatasaray''ın hakimlər tərəfindən qorunması mövzusu yenidən gündəmə gəldi.
''Fənərbaxça'' da kənarda qalmadı. Başqan Sadəttin Saran Türkiyə Futbol Federasiyasından bu epizoda və VAR-ın nə üçün hakimi təkrara baxmağa dəvət etməməsinə aydınlıq gətirməsini tələb etdi.
''Samsunspor''un ekstravaqant prezidenti Yüksəl Yıldırım isə gözlənildiyi kimi ''od püskürdü''. Hələ oyundan öncə ''ədalətli hakimlik olsa, ''Qalatasaray''dan xal alacağıq'' açıqlamasını verən Yıldırım ''Ekol TV''yə bunları dedi:
''Çox əsəbiyəm. Bizdən derbinin intiqamını aldılar. Bu gün bizi meydanda yox etdilər. Xərclədiyim bütün pullar haram olsun! Hakim nə qədər gözləsə də, VAR onu monitora çağırmadı. Ötən tur ''Qalatasaray''ın məşqçisi və yönəticiləri derbidən sonra hakimliklə bağlı bir çox şeylər söylədilər. Görək, indi nə deyəcəklər? İndi də çıxıb danışsınlar! 1 xalımızı əlimizdən aldılar. TFF prezidenti İbrahim Hacıosmanoğlu istefa verməlidi. Çünki dediklərinin heç birini etmir. Ona nə mesaj atım? O da, bütün Türkiyə də epizodu gördü. Özü hakimi çağırıb danışsın. ''Bu da penalti deyilsə, hansı epizodda penalti veriləcək'' deyə soruşsun! Ötən mövsüm də bu stadionda eyni haqsızlığa məruz qalmışdıq. ''Qalatasaray''a bu stadionda hakimlər yardım edir. Avropada hakimlər haqqımıza girmir. Ona görə də yaxşı nəticələr qazanırıq və liderik. Anamızın liqası isə belə görünür, yalnız nəhənglər üçündü. Belə getsə, ''Samsunspor''u Avropanın milli çempionatlarından birində oynadacam. Burda oynamağın bir mənası yoxdu. Oralarda ədalət var. Türkiyədə isə yoxdu. 5 dekabr Türkiyə futbolu tarixinə qara cümə kimi düşdü. Hətta kor hakim belə o epizodda topun ələ dəydiyini görüb penalti verərdi. Mən ''Samsunspor''u çempion edəcəm. Bütün Türkiyə görəcək. Nə vaxta qədər susacağıq? Bizim xalımızı geri qaytarsınlar. TFF bunu necə edəcək, hansı oyunda edəcək, özləri bilər. Mənə dəxli yoxdu. Yetər artıq''.
Digər xəbərlər
