Son həftələrdə ''Beşiktaş''da əsas gündəm mövzusu olan Rafa Silva nəhayət, belə desək, daşı ətəyindən tökməli oldu və bu məsələ ölü nöqtədən tərpəndi.

"Football-plus.az" xəbər verir ki, başqan Sərdal Adalı ilə baş məşqçi Sərgən Yalçın hələ noyabrın 15-də birlikdə mətbuat konfransı keçirərək portuqaliyalı futbolçu ilə bağlı qalmaqallı həqiqətləri açıqlamışdılar. Məhz həmin vaxt ulduz futbolçunun məşqlərə və oyunlara çıxmaq istəmədiyi, eləcə də qış transfer dönəmində Türkiyədən ayrılmaq niyyətində olduğu məlum olmuşdu. Silva əvvəl əzələ, sonra da bel ağrılarını bəhanə gətirsə də, tibbi müayinə zamanı onun heç bir ciddi probleminin olmadığı aşkarlanmışdı.

Noyabrın 2-dən bu yana, yəni 1 aydan çoxdu, məşqlərə çıxmayan 32 yaşlı futbolçu nəhayət, dünən məşqçilər korpusunun bir üzvünün başçılığı altında fərdi məşqə çıxdı. Bu gün isə onun komanda ilə məşqə çıxacağı gözlənilir. Bir müddət öncə vitse-prezidenti Murat Kılıç ''Rafanı mütləq yenidən qazanacağıq, indi bir qədər məşq praktikası azdı, amma üzərində çalışır'' açıqlamasını vermişdi.

Hətta fiziki durumunu yaxşılaşdıracağı təqdirdə Rafa Silvanın bazar ertəsi ''Qaziantep''ə qarşı oyunda adının iştirak ərizəsinə salınacağı istisna edilmir. Amma klubla 2027-yə qədər müqaviləsi olan bu futbolçunun gələcək taleyi hələ də qeyri-müəyyəndi.

Ola bilər ki, Rafa Silva sadəcə qış transfer dönəminə qədər öhdəliklərini yerinə yetirərək oyunlara çıxmağa razılıq verib.