Sərgən Yalçının gəlişindən sonra gözlənilən yüksəlişə nail ola bilməyən və qeyri-sabit çıxışını davam etdirən ''Beşiktaş''da ab-hava da gərgindi.

"Football-plus.az" xəbər verir ki, komandanın əsas lideri Rafa Silva ilə Sərgən Yalçının ulduzu heç cür barışmır. Daha öncəki xəbərlərdə qeyd edilmişdi ki, portuqaliyalı ulduzun digər futbolçulardan fərqli olaraq trenajor zalında çalışmaması Yalçını qane etmir.

Əvvəlki məşqçilər buna göz yumurdularsa, türkiyəli mütəxəssis göz yummaq niyyətindədi deyil. Rafa bəzi matçlarda zədə bəhanəsi ilə ya ümumiyyətlə oynamır, ya da çox tez əvəzlənir. Ən yeni iddialara inansaq, futbolçu bu gərginlikdən bezərək rəhbərliyin qarşısına şok bir şərt qoyub.

Jurnalist Övünç Özdəmin paylaşdığı xəbərə görə, Silva Sərgən Yalçının başçılığı altında oynamaq istəmədiyini və bu mütəxəssis olduğu müddətdə klubda qalmaq istəmədiyini vurğulayıb! Rafa son 3 turun 2-də meydanda olmayıb. Söhbət ''Kasımpaşa'' (1:1) və ''Antalyaspor''la oyunlardan (3:1) gedir. Silva hər iki oyunda zədəsini bəhanə gətirərək meydana çıxmayıb. Halbuki onun heç bir ciddi zədəsi yoxdu. Onu narazı salan daha bir məqam komandadakı ən yaxın dostu - həmyerlisi Joao Marionun göndərilməsidi. Bu futbolçu məşqçilər korpusunun qərarı ilə sentyabrın əvvəllərində AEK-ə icarəyə verildi.

Bu arada Səudiyyə Ərəbistanı klublarının 32 yaşlı futbolçunun durumunu yaxından təqib etdiyi məlum olub. Xüsusilə ''Əl-Əhli'' rəsmi şəkildə olmasa da, Rafa Silvanın transfer şərtləri ilə maraqlanıb və qışda bu mövzuda yeni olayların yaşanacağı istisna edilmir. Qışa qədər isə iki qoçun başının qaynar qazanda necə qaynayacağı, yəni Sərgən Yalçın ilə Rafa Silvanın necə anlaşacağı maraq doğurur. Rəhbərlik ulduz futbolçunun komandada qalmasını istəyir. Elə Rafanın özündən də hələ ki, ayrılıqla bağlı bir tələb gəlməyib. Başqan Sərdal Adalı ikili arasındakı münasibətləri yaxşılaşdırmağa çalışır.

Rafa Silvanın indiyə qədər ''Beşiktaş''da 65 rəsmi oyunda aktivinə 23 qol, 15 məhsuldar ötürmə yazdığını bildirək.