''Beşiktaş''da Rafa Silva qalmaqalına dair yeni xəbərlər var.

"Football-plus.az" xəbər verir ki, məlum olduğu kimi ulduz futbolçu İstanbulda xoşbəxt olmadığı üçün ayrılmaq istədiyini rəhbərliyə bildirib. O, ağrılarını əsas gətirərək ''Fənərbaxça'' ilə oyundan, yəni noyabrın 2-dən bu yana məşqlərə və oyunlara çıxmır.

Rəhbərlik hələ ötən həftəiçi 32 yaşlı futbolçunu tibbi müayinədən keçirmiş və məşqə çıxmağa mane olacaq heç nə aşkarlanmadığını ictimaiyyətə açıqlamışdı. Rafa Silvaya qarşı bütün öhdəliklərini yerinə yetirən ''qartal'' bu futbolçunun məşqə çıxmadığı hər günü qeyd etməyə başlayıb. Deyəsən əlacsız qalan və məsələ FİFA-ya gedəcəyi təqdirdə əli-qolu bağlı olacağını anlayan Rafa Silva ''ağ bayraq'' qaldırmalı olub.

Bunu ''Hürriyət'' nəşri paylaşıb. ''Beşiktaş'' rəhbərliyi futbolçunun təmsilçisi ilə görüşərək ona sonuncu xəbərdarlığı edib. Bu olaydan sonra ''Hürriyət''in yazdığına inansaq, portuqaliyalı futbolçu klubun futbol şöbəsinin üzvləri Kaan Kasacı, Murat Kalaçı və Melih Aydoğdu ilə görüşərək yeni qərarını açıqlayıb. O, rəhbərlik və Sərgən Yalçın ilə heç bir probleminin olmadığını bildirərək məşqlərə çıxacağını deyib.

Rafa Silva Türkiyədə yalnız ailəvi problemlər yaşadığını bildirib və başqa heç bir probleminin olmadığını dilə gətirib. Silva əslində yayda ayrılmaq istədiyini, amma rəhbərlik buna icazə vermədiyi üçün psixoloji durumunun pozulduğunu qeyd edib.

O, qış transfer dönəminə qədər məşqlərə və oyunlara çıxacağını, qışda isə nələr olacağını bilmədiyini əlavə edib. Artıq fərdi məşqlərə başlayan Silvanın ən qısa müddətdə komanda ilə məşqlərə çıxacağı gözlənilir.