''Beşiktaş''da Rafa Silva ilə bağlı böhran tam sürətlə davam edir.

"Football-plus.az" xəbər verir ki, ötən şənbə günü prezident Sərdal Adalı ilə baş məşqçi Sərgən Yalçın birlikdə mətbuat konfransı keçirərək portuqaliyalı ulduz ilə bağlı həqiqətləri açıqlamışdılar. Rafa Silvanın ''Beşiktaş''da oynamaq istəmədiyi, müxtəlif bəhanələrlə məşqlərə, oyunlara çıxmadığı, eləcə də Türkiyədən ayrılmaq istədiyi məlum olmuşdu.

Maraqlısı odu ki, 32 yaşlı yarımmüdafiəçi həmin gündən bu yana hələ də heç bir məşqə çıxmayıb. Rəhbərlik isə artıq radikal addımlar atmağa başlayıb.

Çərşənbə günü Rafa Silva bel ağrılarını əsas gətirərək məşqə çıxmadı. ''Beşiktaş'' isə onu tibbi müayinədən keçirmək qərarına gəldi. Klubun sponsorlarından olan ''Acıbadem'' xəstəxanasındakı tibbi müayinə zamanı futbolçuda bel ağrısına səbəb olacaq hər hansı bir zədə aşkarlanmadı. Ancaq yenə də tibbi personal tərəfindən futbolçuya bel ağrısına qarşı müalicə tətbiq olunub.

Bununla bağlı Rafaya və təmsilçisinə yazılı məlumat verilib. Bu, ona görə edilir ki, bundan sonra klub tərəfindən ulduz futbolçuya ciddi səbəb olmadan məşqə çıxmadığı her günə görə pul cəzası veriləcək. İddialara inansaq, Rafa Silva sabiq klubu ''Benfika''ya qayıtmaq istəyir. Ancaq onun İstanbul nəhəngi ilə 2027-yə qədər müqaviləsi var.

Bir daha ''Beşiktaş'' forması ilə meydana çıxması inandırıcı görsənməyən Silva bu mövsüm 16 rəsmi oyunda 5 qol, 3 məhsuldar ötürmə ilə fərqlənib.