''Beşiktaş''da günlərdi, hətta həftələrdi, Rafa Silva ilə baş məşqçi Sərgən Yalçın arasında problem olduğu barədə iddialar səsləndirilirdi. Biz də bununla bağlı xəbər dərc etmişdik. Hətta portuqaliyalı ulduzun rəhbərliyin qarşısına ''ya Sərgən Yalçın, ya da mən'' şərtini qoyduğu bildirilmişdi.

"Football-plus.az" xəbər verir ki, iddialar əsassız deyilmiş. ''Beşiktaş'' prezidenti Sərdal Adalı baş məşqçi Sərgən Yalçın ilə birlikdə mətbuat konfransı keçirərək Rafa ilə bağlı həqiqətləri açıqlayıb.

Onun sözlərindən belə başa düşmək olar ki, 32 yaşlı yarımmüdafiəçinin Türkiyə karyerası başa çatıb. Silva rəhbərlik ilə görüşərək artıq futbol oynamaq istəmədiyini və karyerasını bitirmək niyyətində olduğunu bildirib. Adalı Rafa Silvanı fikrindən daşındırmaq üçün əllərindən gələn hər şeyi etdiklərini, amma bunu bacarmadıqlarını etiraf edib. Rəhbərliyin ''heç olmasa, qış transfer dönəminə qədər əlindən gələni et'' təklifi də futbolçu tərəfindən geri çevrilib.

Adalı bu məsələnin FİFA-ya qədər uzanacağını istisna etməyib və klubun haqqını sona qədər qoruyacaqlarını deyib. O, Rafa Silvanın müqavilə müddətinin sonuna, yəni 2027-nin yayına qədər Türkiyədə başqa klubda oynamaq ixtiyarının olmadığını bildirib. Axşama qədər Rafa Silvaya düşünmək üçün vaxt verdiklərini deyən prezident vəziyyətin düzəlmək ehtimalının isə 1 faiz olduğunu əlavə edib.