A seriyasında 35-ci və 36-cı turun bəzi oyunlarından sonra turnir cədvəlinin ilk iki pilləsində yerdəyişmə baş vermədi. Buna baxmayaraq, lider “Flamenqo” ilə əsas izləyicisi “Palmeyras” arasındakı xal fərqi artdı.

"Football-plus.az" xəbər verir ki, artıq “Flamenqo”nun çempionluğa daha da yaxınlaşdığını əminliklə demək olar.

35-ci tur ərəfəsində “Palmeyras”ı 2 xal qabaqlayan “Flamenqo” üçün “Braqantino” ilə ev oyununun çətin keçməyəcəyini güman etmək olardı. Amma Filipe Luisin komandası oyun planında üstünlüyə baxmayaraq, ilk hissədə hesabı aça bilmədi. Meydan sahibləri fasilədən sonra azarkeşlərinin nigarançılığına son qoydu. 50-ci dəqiqədə De Arraskaeta Jorjinyonun ötürməsi ilə hesabı açdı. 31 yaşlı uruqvaylı yarımmüdafiəçi bu mövsüm çempionatda 18-ci qolunun sevincini yaşadı. 14 dəqiqə sonra Avropadakı uzunmüddətli karyerasını başa vuraraq doğulduğu ölkəyə qayıdan 33 yaşlı Jorjinyo penalti ilə fərqi iki topa çatdırdı. 72-ci dəqiqədə isə De Arraskaeta Bruno Enrikenin 3-cü qolu vurmasına assistentlik etdi.

3:0 hesablı qələbə ilə mövqeyini qoruyan “Flamenqo”nun “Atletiko Mineyro” ilə səfər oyunu çox çətin keçdi. Argentinalı Xorxe Sampaolinin çalışdırdığı yerli komanda oyun planında üstün olmasa da, fasilə ərəfəsində Bernard ilə hesabı açdı. Qələbə ev sahiblərinə Sudamerikana Kubokuna vəsiqə üçün çox lazım idi. Lakin qonaqlar fasilədən sonra üstünlüyünü daha da artırdılar. “Flamenqo” məğlubiyyətdən meydana ikinci hissədə çıxan Bruno Enrikenin 90+2-ci dəqiqədəki qolu ilə qaça bildi. Filipe Luisin komandası iki oyuna 4 xal toplamaqla həm 1-ci yerdə qaldı, həm də əsas izləyicisindən 5 xal önə keçdi.

Çünki “Palmeyras” iki oyunda hesabına yalnız minimal xal yaza bildi. “Yaşıllar”ın “Fluminense” ilə oyununun asan olmayacağı gözlənilirdi. Əvvəlki turda derbidə “Flamenqo”ya 2:1 hesabıyla qalib gəlməklə “Palmeyras”a çempionluq yolunda böyük dəstək olan “Flu” bu dəfə san paululuları büdrətdi. Libertadores Kubokunun (LK) növbəti mövsümündə oynamağa can atan Luis Subeldiyanın komandası oyun ərzində topa nəzarətdə rəqibinə 46-54 faiz nisbətində uduzsa da, qapıya (18-14) və “çərçivə”yə (4-2) zərbələr üzrə öndə oldu. “Palmeyras”ın qapçısı Migel 4 seyvi ilə komandasını evdə uduzmaqdan xilas etdi. Ancaq o, 36-cı turun “Qremio” ilə səfər oyununda oyundaşlarıyla birgə məğlubiyyət acısı çəkdi. Abel Ferreyranın komandası 24-cü dəqiqədə hesabı açsa da, üstünlüyünü ikinci hissəyə daşıya bilmədi: Amuzunun qolu ilk yarıda 1:1 hesabını rəsmiləşdirdi. “Palmeyras”lılar ikinci hissədə daha çox kobud oyunla yadda qaldılar. Nəticədə onların qapısına iki penalti təyin olundu. Hər iki şansı qola çevirən ev sahibləri sonda 3:2 hesabıyla qalib gəldilər. Son 5 oyunda yalnız 2 xal qazana bilən Ferreyranın komandası lider “Flamenqo”dan 5 xal geri düşdü. Bu isə o deməkdi ki, “Palmeyras”ın həlledici iki turda bu fərqi aradan qaldırıb çempion olmaq şansı möcüzəyə bağlıdı.

Uzun müddət çempionluğa daha bir iddiaçı olan “Kruzeyro” evdə “Korintians”a 3:0 hesabıyla qalib gəldi. Leonardo Jardimin komandası bu qələbə ilə qızıl medallara iddiasını davam etdirdi. Ardıcıl ikinci matçda dubl edən Kayo Jorje bombardirlərin yarışında 21 qolla vahid liderliyini bir qədər də möhkəmləndirdi.

4-cü yerdə olan “Mirassol” da 35-ci turu inamlı qələbə ilə başa vurdu. “Seara”nı üç cavabsız qolla üstələyən Rafael Quanaesin komandasının əvvəlki turda tarixində ilk dəfə LK-da iştirak etmək hüququ qazandığını xatırladaq.

“Botafoqo” da 35-ci turu maksimum xalla başa vurdu. Braziliyanın son çempionu “Qremio” üzərində 3:2 hesablı qələbə qazandı. Bu da var ki, 32-ci turdan sonra titulu əldən verən Davide Ançelottinin komandasının mövsümü mükafatçılar sırasında başa vura bilməyəcəyi dəqiqləşdi.

35-ci tur
Flamenqo - Braqantino 3:0
De Arraskaeta, 50. Jorjinyo, 64-p. Bruno Enrike, 72.
Palmeyras - Fluminense 0:0
Kruzeyro - Korintians 3:0
Kayo Jorje, 26; 49. Arroyo, 64.
Mirassol - Seara 3:0
Nequeba, 3. Reynaldo, 23. Alesson, 77.
Botafoqo RJ – Qremio 3:2
Kuyabano, 15. Artur, 19. Marçal, 83 – Andre Enrike, 49. Vinisius, 90.
San Paulu - Juventude 2:1
Bobadilya, 7. Riqoni, 90+4 – Ferrarezi, 90+6-öz qapısına.
Bayya - Vasku da Qama 1:0
Pulqa, 73.
Sport Resife - Vitoriya 1:3
Pablo, 29 – Kandido, 13-öz qapısına. Aytor, 15. Renato Kayzer, 48.
İnternasyonal - Santos 1:1
Alan Patrik, 20 – Barreal, 62.
“Fortaleza” – “Atletiko Mineyro” oyunu noyabrın 30-da keçiriləcək.

36-cı tur
Atletiko Mineyro – Flamenqo 1:1
Bernard, 34 – Bruno Enrike, 90+2.
Qremio – Palmeyras 3:2
Amuzu, 45+3. Vinisius, 61-p. Villian, 85-p. - Torres, 23. Benedetti, 90+3.
Braqantino – Fortaleza 0:1
Bareyro, 76.
Fluminense – San Paulu 6:0
Kanobbio, 9-p.; 77. Martinelli, 16. Nonato, 24. Kennedi, 69. Serna, 87.

1. Flamenqo 36 22 9 5 74-24 75
2. Palmeyras 36 21 7 8 60-32 70
3. Kruzeyro 35 19 11 5 52-25 68
4. Mirassol 35 17 12 6 58-34 63
5. Fluminense 36 17 7 12 46-38 58
6. Botafoqo RJ 35 16 10 9 50-32 58
7. Bayya 35 16 8 11 47-43 56
8. San Paulu 36 13 9 14 40-46 48
9. Qremio 36 12 10 14 42-48 46
10. Braqantino 36 13 6 17 40-54 45
11. Korintians 35 12 9 14 38-42 45
12. Atletiko Mineyro 35 11 12 12 38-40 45
13. Vasku da Qama 35 12 6 17 50-52 42
14. Seara 35 11 9 15 32-35 42
15. İnternasyonal 35 10 11 14 40-48 41
16. Vitoriya 35 9 12 14 32-48 39
17. Santos 35 9 11 15 36-50 38
18. Fortaleza 35 9 10 16 38-53 37
19. Juventude 35 9 6 20 33-64 33
20. Sport Resife 35 2 11 22 28-66 17

Bombardirlər: Kayo Jorje (Kruzeyro) - 21, De Arraskaeta (Flamenqo) - 18, Vitor Roke (Palmeyras) - 16, Veqetti (Vasku da Qama) - 14.