Bu gün “Qarabağ”ın fizioterapevti Nikolas Ruşel sosial şəbəkə hesabında maraqlı paylaşım edib.

“Football-plus.az” xəbər verir ki, mütəxəssis “köhlən atlar”ın futbolçusu Kadi Borgesin məşq etdiyi görüntüləri izləyiciləriylə bölüşüb. İş ondadı ki, görüntülərdən oyunçunun bir ayağının hələ də sarğıda olduğu bəlli olur.

Görünür, uzun müddətə sıradan çıxması Borgesin psixoloji durumuna mənfi təsir etməyib. Əksinə o, yaşıl meydanlara daha güclü və inamlı qayıtmaq niyyətindədi və məhz bu məqsədlə intensiv fiziki məşqlər edir.

Öz aramızdı, Kadinin buna həqiqətən ehtiyacı var. Ona görə ki, bir zamanlar vurduğu “torba-torba” qollarla “Qarabağ” azarkeşlərinin sevimlisinə çevrilən futbolçu son dönəmlərdə uğursuz çıxışlarla yadda qalıb. 2025/26 “futbol ili”ndə premyer-liqada 9 matç keçirən braziliyalı cəmi 1 qol, 1 məhsuldar ötürməyə imza atıbsa, Çempionlar Liqasında meydana çıxdığı 10 oyunda 1 qol, 2 məhsuldar ötürmə müəllifi olub.

Xatırladaq ki, Kadi noyabrın 5-də “Çelsi”yə qarşı keçirilən oyunda zədələnib. Futbolçunun sol fibulasında sınıq aşkarlanıb. Həkimlərin ilkin proqnozuna görə, müalicə və bərpa prosesi təxminən 8–10 həftə davam edəcək.

KƏNAN BAHADIR