Xəbər verdiyimiz kimi, “Qarabağ” Çempionlar Liqası üçün iştirak ərizəsində dəyişiklik edib. Belə ki, zədə səbəbindən sıradan çıxan Kadi Borgesin yerinə Xoni Montiel daxil edilib.

Qurban Qurbanovun verdiyi bu qərar nə dərəcədə doğrudu? Kadi, adətən, 10 nömrə mövqeyində oynayır. Amma cinahda başlayıb, mərkəzə meyilləndiyini də görmüşük. Topla incə davranan Kadidən fərqli Montiel döyüşkən, qorxmadan top uğrunda mübarizə aparan, daim mübarizə içində olmaq istəyən futbolçuya bənzəyir.

Qəbul edək ki, Kadi “Qarabağ”dakı ilk dönəmindəki Kadi deyil. Bu mövsüm də istər Yankoviç, istər Leandro ondan daha çox faydalı iş əmsalı ilə yadda qalır. “Çelsi” ilə oyunda iki qolu məhz Kadi meydanda olmayanda vurduq. İndi də Xoni Montiel meydana çıxıb. Qurban Qurbanov belə riskə gedirsə, deməli, ispaniyalı futbolçuda başqa keyfiyyətlər də sezib.

Ümid edək ki, bu gediş uğurlu olar.

MÜZƏFFƏR QULUZADƏ