“Qarabağ”ın yarımmüdafiəçisi Yassin Benzyanın komandadan ayrılacağı ilə bağlı xəbərlər durmadan artır.

Əlcəzairli futbolçu indiki maliyyə durumundan narazıdı, uzaq Səudiyyə Ərəbistanına can atır. Bəs o, komandaya cari mövsümdə hansı faydanı verib?

“Köhlən atlar”ın 7 nömrəsi bu mövsüm ölkə çempionatında çıxdığı 27 oyunda 5 qol, 6 məhsuldar ötürmə, kubokda 1 qol, 1 məhsuldar ötürmə ilə yadda qalıb. Avrokubokların son mövsümündə 13 oyuna 3 qol, 3 məhsuldar ötürməsi var.

31 yaşlı futbolçunun mövqeyini nəzərə alsaq, statistika heç də parlaq deyil. Yassin əsasən hücumameyilli yarımmüdafiəçi kimi oynayır, amma sağ vinger kimi də oynamağı bacarır. Sadəcə, Kadi Borgesin gəlişindən sonra Qurban Qurbanov ona əsasən dayaq yarımmüdafiəçi kimi güvənir.

Ümumiyyətlə, Yassinin bu gün Kadidən üstün olduğunu demək olmaz. Futbolçuların maaşı baxımından həmişə sabitliyi qoruyan “Qarabağ” rəhbərliyinin Benzyanın təklifini qəbul edəcəyini inandırıcı görünmür. Heç doğru qərar da olmaz. Ümumiyyətlə, gedəni saxlamazlar!

MÜZƏFFƏR QULUZADƏ